بنگلورو ،7؍مارچ (ایس او  نیوز) آنے والے بروہت بنگلور مہا نگر پالیکے ( بی بی ایم پی ) انتخابات میں کم سے کم 108خواتین کو امیدوار بنایا جائے گا۔ بی بی ایم پی کے 192وارڈوں میں خواتین کے لئے 50فیصد ریزرویشن کے باوجود مزید خواتین امیدوار بن سکتی ہیں ،اس بات کو مدنظر رکھ کر آپ نے 108وارڈوں میں خواتین کو اپنا امیدوار بنانے کااعلان کیا ہے ۔

پریس کلب میں اخباری کانفرنس کے د وران عاپ لیڈر مالو کا گبی وانی نے بتایا کہ جو وارڈ خواتین کو مختص کئے جائیں گے۔ ان وارڈوں کے علاوہ دیگر وارڈس میں جہاں خواتین امیدوار اپنی جیت درج کرسکتی ہیں ایسے وارڈوں کی نشاندہی کرکے پارٹی یہاں سے خاتون امیدواروں کو میدان میں اتارے گی۔ انہوں نے کہا کہ حالیہ دنوں میں سیاسی پارٹیاں خواتین کی فلاح و بہبودی کا وعدہ کرکے انہیں پوری طرح نظر انداز کرتی آرہی ہیں۔ اس کے علاوہ خواتین کو آگے بڑھنے کا موقع تک نہیں دیا جارہا ہے ۔

انہوں نے کہا کہ خواتین سیاست اور انتظامیہ میں بھی اپنی صلاحیتوں کو منوا تے ہوئے مردوں کے ساتھ کندھے سے کندھا ملا کر آگے بڑھ سکتی ہیں ۔ صرف انہیں موقع کی تلاش ہے ۔ خواتین کو موقع فراہم کرنے کے مقصد سے سہی آنے والے بی بی ایم پی انتخابات میں 108سیٹیں خواتین کے لئے مختص کرنے کا عاپ نے فیصلہ کیا ہے۔انہوں نے بتایا کہ بی بی ایم پی میں ڈمی کارپوریٹران کی تعداد بڑھنے لگی ہے ۔ خواتین کارپوریٹر کٹھ پتلی بننے کی بجائے اپنے حقوق کے لئے آواز اٹھا کر خواتین کی فلاح وبہبود کیلئے کام کریں گیں۔