نئی دہلی، 27؍اگست(ایس او نیوز/آئی این ایس انڈیا)سوراج ابھیان کے لیڈر یوگیندر یادو نے آج الزام لگایا کہ آپ حکومت نے اقتدار میں آنے کے بعد سے مختلف زمروں کے تحت شراب کی فروختگی کے لیے 400سے زیادہ لائسنس دیا اور دہلی میں شراب کی کھپت کم کرنے کا اروند کیجریوال کا وعدہ ایک ڈرامہ ہے۔یادو نے شاپنگ مالز ایل 10اور ڈپارٹمنٹل اسٹورایل 12میں خوردہ دکانیں کھولنے کے لیے لائسنس دینے میں بے ضابطگیوں کا الزام لگایا۔انہوں نے ایک پریس کانفرنس میں کہا کہ اصلی کھیل یہاں ہورہا اور وہ اس سے جلد پردہ اٹھائیں گے۔مبینہ پارٹی مخالف سرگرمیوں کے لیے عام آدمی پارٹی سے نکالے گئے یادو نے کہا کہ دہلی میں آپ حکومت نے نشہ سے بچاؤکی مہموں پر محض 16000روپے خرچ کیا ۔انہوں نے دعوی کیا کہ یہ اعداد و شمار سرکاری ریکارڈ سے لئے گئے ہیں ۔یادو نے کہاکہ حکومت نے شراب کی دکانوں کے بارے میں چار آر ٹی آئی درخواستوں پر چار الگ الگ جواب دیا ، لیکن گہرائی سے چھان بین کرنے پر ہمیں پتہ چلا کہ 10؍اگست تک 399نئے لائسنس دئیے جا چکے ہیں۔اب یہ 400سے تجاوز کر گئے ہوں گے۔کیجریوال کو آڑے ہاتھ لیتے ہوئے یادو نے کہا کہ یہ بات مضحکہ خیز ہے کہ اسی شخص نے نئی شراب کی دکانیں کھولے جانے سے پہلے اپنی کتاب ’سوراج‘میں لوگوں کی اور خاص طور پر خواتین کی رضامندی لینے کو اہمیت دی۔یادو نے ویڈیو کلپ بھی چلایا جس میں کیجریوال مبینہ طور پر اسمبلی انتخابات کی تشہیری مہم کے دوران اسی طرح کا وعدہ کرتے نظرآ رہے ہیں۔انہوں نے کہا کہ اس سلسلے میں محلہ سبھاؤ ں کو مزید اختیارات دینے کا دہلی حکومت کا حالیہ اقدام محض دھوکہ ہے اور ان اداروں کو کسی طرح کی قانونی بنیاد فراہم کرنے کے لیے نوٹیفکیشن تک نہیں دیا گیا ہے جن کی تعداد تقریبا 3000ہے۔