نئی دہلی:5/نومبر(ایس او نیوز/آئی این ایس انڈیا)معروف انسانی حقوق کارکنوں نے ایک پروگرام کے دوران شہیداشفا ق اللہ خانؒ کو خراج تحسین پیش کرتے ہوئے کہاکہ عظیم محب وطن اور راسخ العقیدہ اشفا ق اللہ خان کی قومی محبت ان کیلئے اپنے مذہب سے کم نہیں تھی ۔ جعفرآبا د کے مدرسہ باب العلوم میں’مجاہد آزادی اشفا ق اللہ خان ؒ کی حیات وخدمات ‘کے عنوان پر منعقدسمینار میں اہم شخصیات نے اشفا ق اللہ خان کی زندگی کے احوال بیان کئے اوراُنکی قومی وملی خدمات کو ناقابل فراموش بتاتے ہوئے کہاکہ اشفا ق اللہ خان جیسے سخت اور قوم پرست اپنے سینے میں وطن عزیز کی آزادی کیلئے تڑپ رکھتے تھے ، یہی وجہ ہے کہ انگریزوں کی غلامی کے چنگل سے ہندوستان کو آزادکرا نے کیلئے انہوں نے اپنی جان کی بازی لگادی ۔مدرسہ کے ناظم مولوی داؤ د ظفر امینی کی صدارت میں منعقد پروگرام میں آل انڈیا یونانی طبی کا نگریس کے سربراہ ڈاکٹر سید احمد خان ،آل انڈیا ملی کو نسل (صوبہ دہلی) کے سرپرست ڈاکٹر الحا ج پرویز میاں ،سد بھاؤنا وکاس منچ کے قومی صد ر مولوی محمدجاویدقاسمی صدیقی نے اپنی گفتگو میں شہید اعظم اشفا ق اللہ خان کی زندگی کے مختلف پہلوؤں پر روشنی ڈالتے ہوئے بتایا کہ ملک کی آزادی کیلئے اشفا ق اللہ خان نے ہنسی خوشی جام شہادت نوش کیا۔پروگرام میں موجود مقررین نے اشفا ق اللہ خان کے ذریعہ جیل میں لکھے گئے ایک خط کے حوالہ سے کہاکہ انہوں نے ہم وطنوں سے اپیل کی تھی کہ آپکا مذہب ،آپکی روایات چاہے کچھ بھی ہو ، ان سے اوپر اٹھ کر ملک کی خدمات میں ایک دوسرے سے تعاون کیجئے ،حکومت برطانیہ سے لوہا لیجئے اور ملک کو آزاد کرائیے۔ قبل ازیں کہکشاں نے تلاوت قرآنی سے تقریب کاآغاز کیا جبکہ ناظرین ،نصرین ،ببلی نے نعت شریف پیش کی اور آسیہ ،صوفیہ ،ریشما ،علیشاں نے تقریر پیش کی ۔پروگرام کو کامیاب بنا نے میں محسن صدیقی ،محمد نفیس ،محمد ارسلان خان ودیگرنے اہم کردار ادا کیا۔پروگرام کی نظامت حکیم عطاء الرحمان اجملی نے کی جبکہ اختتام پر حافظ غفران نقشبندی نے تمام مہمانان کا شکریہ ادا کیا۔