بنگلورو۔14؍مارچ(ایس او نیوز) 23 مارچ کو راجیہ سبھا انتخابات کیلئے پولنگ کے فوراً بعد ریاستی جنتادل (ایس) کے سات باغی اراکین اپنی اسمبلی رکنیت سے استعفیٰ دے دیں گے، اور فوراً کانگریس میں شمولیت اختیار کرلیں گے۔ جنتادل (ایس) کے اراکین اسمبلی چلوورایا سوامی ، ایچ سی بال کرشنا، ضمیر احمد خان ، رمیش بنڈی سدے گوڈا، اقبال انصاری ، بیمہ نائک اور اکھنڈا سرینواس مورتی 23مارچ کوراجیہ سبھا انتخابات کی پولنگ حصہ لیں گے اور فوراً بعد جنتادل (ایس) کو خیر باد کہہ دیں گے۔ بتایا جاتا ہے کہ 25مارچ کو میسور میں صدر کانگریس راہول گاندھی کی ریلی کے دوران یہ تمام اراکین اسمبلی باضابطہ کانگریس میں شامل ہوجائیں گے۔ اس سے پہلے 2016کے راجیہ سبھا انتخابات میں ان اراکین نے پارٹی کے خلاف بغاوت کی تھی، اس وقت مہالکشمی لے آؤٹ کے رکن اسمبلی گوپالیہ بھی باغیوں میں شامل تھے، تاہم انہوں نے چند ماہ قبل پارٹی قیادت سے صلح کرلی، باقی سات اراکین اسمبلی اپنی بغاوت پر اڑے رہے، اب کانگریس پارٹی میں محض ان کی رسمی شمولیت باقی رہ گئی ہے۔