بنگلورو،3؍جون(ایس او نیوز) ریاست میں کسانوں کے زرعی قرضہ جات معاف کرنے کا مطالبہ کرنے کیلئے 10جولائی کو بی جے پی بنگلور میں زبردست احتجاجی مظاہرہ کرنے کیلئے ریاست بھر سے لاکھوں کسانوں کو یکجا کرے گی۔ یہ بات آج ریاستی بی جے پی صدر بی ایس یڈیورپا نے کہی۔ شہر کے کے آر پورم کے ایک نجی ہوٹل میں منعقدہ بنگلور ضلع بی جے پی مجلس عاملہ کی میٹنگ سے مخاطب ہوکر انہوں نے کہاکہ کسانوں کا قرضہ معاف کرو یا اقتدار چھوڑو تحریک کے ذریعہ بی جے پی ریاست بھر میں بیداری مہم چلائے گی۔ انہوں نے کہاکہ جب سے ریاست میں کانگریس حکومت آئی ہے ریاست کی ترقی مفلوج ہوکر رہ گئی ہے۔اپنی گروہی انتشار میں الجھی کانگریس کو ریاست کی ترقی پر توجہ دینے وقت نہیں ہے۔ ریاست کے نظم وضبط کو درہم برہم قرار دیتے ہوئے یڈیورپا نے کہا کہ عوام کو خوف اور دہشت کے ماحول میں زندگی بسر کرنی پڑ رہی ہے۔ منتخب نمائندے بھی ڈر ڈر کر جینے پر مجبور ہوچکے ہیں۔انہوں نے کہا کہ بی جے پی کا مقصد ریاست کو پوری طرح کانگریس سے آزاد کرانا ہے۔ بی جے پی آنے والے دنوں میں ریاست کے عوام کے امنگوں پر کھری اترے گی۔کانگریس پر امبیڈکر کی توہین کرنے کا الزام لگاتے ہوئے یڈیورپانے کہاکہ آج یہ دلتوں کی فلاح وبہبود کی باتیں کرتی ہے، انہوں نے اس موقع پر وزیر اعلیٰ سدرامیا کی طرف سے دلت طلبا کو مفت بس پاس دینے کے فیصلہ کا خیر مقدم کرتے ہوئے کہاکہ چار سال بعد سدرامیا کو اس کا خیال آیاہے، وزیر اعلیٰ سدرامیا کو انتہائی سست اور کاہل قرار دیتے ہوئے سابق نائب وزیراعلیٰ آر اشوک نے کہاکہ سدرامیا ملک کے کاہل ترین وزیر اعلیٰ ہیں، جبکہ کانگریس کے انچارج برائے کرناٹک وینوگوپال دعویٰ کرتے ہیں کہ ریاست کی سدرامیا حکومت فعال ہے۔ اس موقع پر مرکزی وزیر سدانند گوڈا نے کہاکہ ریاستی حکومت کی طرف سے عوام کی فلاح کیلئے جن اسکیموں کا اعلان کیاگیا ان کو دیانتداری سے نافذ نہیں کیاگیا ہے۔ جلسہ میں رکن پارلیمان پی سی موہن ، سابق رکن اسمبلی نندیش ریڈی ، بی بی ایم پی کے اپوزیشن لیڈرپدمانابھا ریڈی، رکن اسمبلی منی راجو وغیرہ موجود تھے۔