آرایس ایس کے سابق پرچارک کا سنسنی خیزانکشاف، بی جے پی کو جیت دلانے آر ایس ایس نے کرائے تھے بم دھماکے
نانڈیز:یکم ستمبر(ایس اؤ نیوز) ممبئی سے تعلق رکھنے والے آر ایس ایس اور بجرنگ دل کے سابق رکن یشونت شندھے نے سنسنی خیز خلاصہ کرتےہوئے اس بات کا دعویٰ کیا ہے کہ ہندوستان بھر میں جو بم دھماکے ہوئے تھے وہ آر ایس ایس نے کروائے تھے۔
نانڈیزعدالت میں حلفنامہ داخل کرتے ہوئے شندھے نے کہا ہے کہ 2006 میں نانڈیز کے پٹ بندھارے نگر میں جو بم دھماکے ہوئے تھے وہ بھی آر ایس ایس نے کروائے تھے تاکہ بی جے پی انتخابات میں جیت درج کرسکے۔ انہوں اپنے حلفنامہ میں خود کو گواہ کے طورپربھی پیش کیا اور دھماکوں کے متعلق تمام جانکاری شیئر کرنے کی بھی پیش کش کی۔
سیاسی گلیاروں میں ہلچل پیدا کرنے والے وڈیو میں شندھے نے دعویٰ کیا ہے کہ وہ وی ایچ پی، بجرنگ دل اور 1995سے آر ایس ایس کا ممبرہے۔ اس نے آگے یہ بھی دعویٰ کیا ہے کہ وہ ہمانشو پانسےاور 20دیگر افراد کے ساتھ تربیتی کیمپ میں شرکت کرچکا ہے جو ناندیڑ بم دھماکوں میں مارے گئے تھے۔
یشونت شندھے نے کہاہےکہ وہ ہمانشو پانسے سے ملنے کئی بار ناندیڑ گیا اور انہیں ایسا نہ کرنےکو بھی کہا۔ ’’کیونکہ آر ایس ایس اور وشوہندو پریشد کا پورے ملک میں دھماکےکروانے کا منصوبہ اتنا کامیاب نہیں ہوا جیسا کہ توقع کی جارہی تھی اور بی جے پی کو زیادہ فائدہ نہیں پہنچا۔ نتیجتاً 2004کے انتخابات میں کانگریس پارٹی کو اکثریت ملی تو ملند پراندے جیسے لوگ جو اہم سازش کار تھے خوف زدہ ہوکر زیر زمین چلے گئے ، لیکن وہ خفیہ طورپر سازشیں کرتے رہے، زیر زمین رہتے ہوئے ملک بھر میں کئی بم دھماکے کئےاور متعصب پولس اور ایک طرفہ میڈیا کی مدد سے ان دھماکوں کا الزام مسلمانوں پر لگایا۔ جس سے 2014کے لوک سبھا انتخابات میں ان کو مدد ملی ۔
شندھے کا وڈیو جاری ہونے کے بعد کانگریس کے ترجمان پون کھیرا نے اپنے آفیشیل ٹوئیٹر اکاؤنٹ پر بی جےپی کو نشانہ بناتے ہوئے لکھا ہے کہ اس سے بڑی بریکننگ نیوز کیا ہوسکتی ہے۔ پون کھیرا نے لکھا ہے کہ آر ایس ایس کے پرچارک یشونت شندھے نے ایک حلف نامہ داخل کیا ہے جس میں سنگھ کی ملک دشمن کارروائیوں کے بارےمیں خوفنا ک معلومات فراہم کرتےہوئے بے نقاب کیا گیا ہے۔ پورے ملک میں دھماکوں کی سازش رچی گئی ، اس میں کون کون ملوث تھے؟ اس سے بڑی بریکننگ نیوز کیا ہوسکتی ہے۔
کھیرا کے ٹویٹ کے بعد کانگریس کے ایک اور سنیئر لیڈر دگ وجئے سنگھ نے اس تعلق سے ٹویٹ کرتے ہوئے کہاہے کہ یشونت شندھے نے انتہائی حوصلہ مندی کے ساتھ حلف نامہ داخل کیا ہے ، جن لوگوں کے نام یشونت شندھے نے لئے ہیں وہ مجرمانہ نوعیت کے لوگ ہیں۔ اس بیان کے بعد اس کی جان کو خطرہ ہوسکتاہے۔ممبئی کے کمشنر آف پولس کو فوری طورپر یشونت کی حفاظت کے لئےسخت انتظامات کرنے چاہئے۔
