پاکستان میں زبردست بم دھماکہ 40سے زائدافراد جاں بحق، 100زخمی
اسلام آباد، 31/جولائی(ایس او نیوز/ایجنسی)پاکستان میں دہشت گردی کے واقعات کم ہونے کا نام نہیں لے رہے ہیں۔ تازہ ترین معاملہ پاکستان کے خیبرپختونخواکے علاقے باجوڑ سے تعلق رکھتا ہے جہاں اتوار یعنی 30جولائی کو ایک زوردار دھماکہ ہوا۔ مقامی میڈیا رپورٹس کے مطابق اس بم دھماکے میں 40افرادسے زائد جاں بحق جب کہ 100افراد شدید زخمی ہیں، جن میں سے کئی کی حالت تشویشناک ہے۔ ایسے میں مرنے والوں کی تعداد بڑھ سکتی ہے۔
رپورٹ کے مطابق جمعیت علمائے اسلام (ف)کی ورکرز کانفرنس کو نشانہ بنایا گیا ہے۔ پولیس کے مطابق دہشت گردوں نے دھماکہ جے یو آئی(ف)کے اجلاس کو نشانہ بنا کر کیا۔ جائے حادثہ پر راحت اور بچا ؤکا کام جاری ہے۔ ساتھ ہی زخمیوں کو موقع سے اسپتال لے جایا جا رہا ہے۔
سوشیل میڈیا پر دھماکے کے بعد کی ویڈیوز اور تصاویر شیئر کی جا رہی ہیں، جن میں بم دھماکے کو دیکھا جا سکتا ہے۔ اس واقعہ کے بعد پورے علاقے میں خوف و ہراس کا ماحول ہے۔ جے یو آئی(ف)کے سینئر رہنما حافظ حمد اللہ نے پاکستانی نیوز چینل سے گفتگو کرتے ہوئے حکومت سے اپیل کی ہے کہ زخمیوں کیلئے ہنگامی طبی اقدامات کو یقینی بنایا جائے۔
ابھی گزشتہ منگل کو ہی خیبر پختونخوا میں ایک زیر تعمیر مسجد میں خودکش حملہ ہوا، جس میں ایک پولیس اہلکار ہلاک، جب کہ متعدد زخمی ہوئے۔ اس واقعہ کی خوفناک ویڈیو سوشیل میڈیا پر بھی وائرل ہوئی۔
قابل ذکر بات یہ ہے کہ پاکستان میں دہشت گردی کے واقعات میں اضافہ ہوا ہے۔ دی ڈان کی رپورٹ کے مطابق گزشتہ سال 18 جون 2022 سے 18 جون 2023 تک خیبرپختونخوا میں 665 دہشت گرد حملے ہوئے جن میں 15 خودکش دھماکے بھی شامل تھے۔