وزیر تعلیم کا اعلان :مہاراشٹرا میں 5 ویں سے 8 ویں جماعت کے لیے 27جنوری سے کھلیں گے اسکول
ممبئی ،17؍جنوری (آئی این ایس انڈیا) مہاراشٹرا میں 5ویں سے 8ویں جماعت کے طالب علموں کے لیے اسکول کھلنے کی تاریخ مقرر کردی گئی ہے۔ ریاست میں 27 جنوری 2021 سے اسکول کھلیں گے ۔ اس سلسلے میں ریاست کے وزیر تعلیم ورشا گایکواڈ نے اعلان کیا ہے۔ وزیر تعلیم نے کہا کہ بچوں کی حفاظت ہماری اولین ترجیح ہوگی۔ انہوں نے ٹویٹ کرکے یہ معلومات دی ہے۔ انہوں نے کہا کہ وزیر اعلی نے ریاست میں 5 ویں سے 8 ویںتک کے طلباء کے لئے کلاس شروع کرنے کی منظوری دی تھی۔ انہوں نے بتایا کہ یہ کلاس 27 جنوری سے تمام احتیاطی تدابیر کے ساتھ کھولے جائیںگے ،انہوں نے مزید کہا کہ وزیر اعلی نے طلباء کی حفاظت کا یقین دلایا ہے۔ایک دیگرسرکلر میں بی ایم سی نے ممبئی شہر میں اسکولوں اور کالجوں کو دوبارہ کھولنے پر پابندی عائد کردی ہے۔ بی ایم سی کے جاری کردہ سرکلر کے مطابق تمام اسکول اور کالج جو پہلے 15 جنوری تک بند تھے اس کے تحت اب مزید احکامات تک بند رہیںگے ۔ بی ایم سی نے ابھی تک اسکول کو دوبارہ کھولنے کے لئے کوئی تاریخ نہیں بتائی ہے۔ ملک کی دیگر ریاستوں کے اسکولوں نے بھی بڑی تعداد میں دوبارہ اسکول کھولنا شروع کردیا ہے۔ اس معاملے میں آسام نے پہلے ہی تمام طلبا کے لئے اسکول کھول دئیے ہیں۔