قاہرہ،13/ستمبر (ایس او نیوز/ایجنسی) گزشتہ دنوں بحیرۂ روم سے اٹھے طوفان ’ڈینیل‘ نے لیبیا میں ایسی تباہی مچائی ہے جس کا ازالہ ممکن نظر نہیں آ رہا۔ اس طوفان کے بعد لیبیائی عوام پر پانی نے زبردست تباہی مچائی ہے اور ہزاروں جانیں سیلاب کی نذر ہو گئی ہیں۔ ایک رپورٹ کے مطابق اب تک 5000 سے زائد اموات ہو چکی ہیں اور 10 ہزار سے زیادہ لوگ لاپتہ ہیں۔ حالات کچھ ایسے پیدا ہو گئے ہیں کہ قبرستانوں کے سامنے لاشوں کا ڈھیر ہے اور ان کی تدفین کے لیے قبرستان میں جگہ نہیں۔

پہلے سے ہی معاشی بدحالی کا سامنا کر رہے ملک لیبیا پر طوفان کے دور رَس اثرات مرتب ہوتے ہوئے دکھائی دے رہے ہیں۔ ڈینیل طوفان کے بعد جو زوردار بارش ہوئی ہے، اس نے اچانک سیلاب والے حالات پیدا کر دیے اور مشرقی لیبیا کے کئی شہروں میں زبردست تباہی کا منظر دیکھنے کو مل رہا ہے۔ بارش اور سیلاب کے بعد کچھ علاقوں میں پشتے ٹوٹ گئے ہیں جن کا پانی آس پاس کے علاقوں میں پھیل گیا۔ سب سے زیادہ نقصان ڈیرنا علاقہ کا ہوا ہے جہاں سب سے زیادہ ہلاکتیں سامنے آئی ہیں۔ اس علاقے سے تقریباً 20 ہزار افراد نقل مکانی پر مجبور ہوئے ہیں۔

بتایا جا رہا ہے کہ آنے والے وقت میں ڈیرنا کو مزید مشکلات کا سامنا کرنا پڑ سکتا ہے۔ یہاں ہلاکتوں کی تعداد بھی بڑھ سکتی ہے کیونکہ شہر کا ایک چوتھائی حصہ پوری طرح سے تباہ ہو گیا ہے۔ سوشل میڈیا پر ڈیرنا شہر کی کچھ کچھ ویڈیوز وائرل ہو رہی ہیں جن میں گاڑیاں اور عمارتیں پانی میں بہتی ہوئی دیکھی جا سکتی ہیں۔ پورے کے پورے محلے اس سیلاب میں بہہ گئے۔ سیلاب نے پشتوں کو توڑ دیا اور تقریباً ایک لاکھ کی آبادی والے اس شہر کو تقریباً نیست و نابود کر دیا۔

مشرقی لیبیا حکومت کے وزیر صحت عثمان عبدالجلیل کا کہنا ہے کہ لیبیا میں اس وقت حالات انتہائی خوفناک ہیں۔ شہر کے کئی حصوں میں لاشیں زمین پر پڑی ہوئی ہیں اور اسپتالوں میں بھی لاشوں کا انبار لگا ہوا ہے۔ ڈیرنا کا تذکرہ کرتے ہوئے عبدالجلیل نے بتایا کہ وہاں اب تک ہزاروں لاشوں کی تدفین ہو چکی ہے۔