فضائی بمباری کے بعد اسرائیل زمینی حملوں پراترآیا، غزہ میں داخلے کی کوشش، رہائشی عمارتوں کو تباہ کرنے کا سلسلہ جاری
فلسطین 26 اکتوبر (ایس او نیوز/ایجنسی) غزہ پر فضائی بمباری کے بعد اسرائیل اب زمینی حملوں پر اتر آیا ہے، میڈیا رپورٹوں کی مانیں تو اسرائیلی فوج نے غزہ میں داخل ہونے کی کوشش کی ہے جبکہ ٹینکوں نے جنوبی غزہ کے مختلف علاقوں میں گولہ باری کرکے کئی رہائشی عمارتوں کو تباہ کردیا ہے۔
بتایا گیا ہے کہ اسرائیلی وزیراعظم نے رات کو زمینی حملے کی دھمکی دی تھی، جس کے بعد زمینی حملوں کی اطلاع ملی ہے۔ اس دوران زخمیوں میں شامل بچوں کی ویڈیوزسوشل میڈیا پر وائرل ہونے کے بعد دیکھنے والوں کے دل دہل گئے ہیں۔
یاد رہے کہ غزہ میں 18 دنوں سے بجلی، پانی اور ایندھن کی فراہمی بند ہے، جنریٹرز کے بغیر اسپتال کام کرنے سے قاصر ہیں۔کہا جارہا ہے کہ اسرائیل غزہ کا محاصرہ جاری رکھ کر بھوک کو جنگی ہتھیار کےطور پر استعمال کر رہا ہے۔ فلسطینی وزارت صحت کا کہنا ہے کہ گزشتہ 24 گھنٹوں میں اسرائیل کی بمباری سے تقریباً 481 فلسطینی جاں بحق ہوئے ہیں، اور اب تک کی اموات کا حساب لگائیں تو اسرائیلی فوج کی بمباری سے غزہ میں اب تک7 ہزار 28 فلسطینی جاں بحق ہو چکے ہیں۔