میسور میں گیس لیک ہونے سے خاندان کے چار افراد کی دم گھٹنے سے ہوئی موت
میسور 22/مئی (ایس او نیوز): میسور کے یرا گناہلّی میں ایک ہی خاندان کے چار افراد مشتبہ حالات میں مردہ پائے گئے، جن کے تعلق سے شبہ ظاہر کیا گیا ہے کہ گھر کے سلینڈر سے ایل پی جی گیس لیک ہونے سے ان چاروں کی نیند کی حالت میں ہی موت واقع ہوئی ہوگی۔
مرنے والوں کی شناخت کمارا سوامی (45) کے طور پر کی گئی ہے، جو سدھارتھ نگر میں جے ایس ایس اسکول کے ساتھ کپڑے دھونے کی دکان چلاتے تھے۔ اس کی بیوی منجولا (39)؛ اور ان کے بچے ارچنا (19) اور سواتھی (17) میں ہلاک شدگان میں شامل ہیں۔
ذرائع کا کہنا ہے کہ بچے الگ کمرے میں سو رہے تھے جب کہ والدین دوسرے کمرے میں اکٹھے سوتے تھے۔ ارچنا اور سواتھی کالج کی طالبات تھیں۔ جب وہ پچھلے دو دنوں سے کالج نہیں پہنچیں تو ان کی سہیلیوں نے ان سے رابطہ کرنے کی کوشش کی، جب ناکام رہے تو وہ ان کے گھر پہنچ گئے ، جہاں المناک منظر کا پتہ چلا۔ گھر میں مبینہ طور پر چار گیس سلنڈر بھی ملے ہیں۔
خیال کیا جاتا ہے کہ یہ ہلاکتیں دو روز قبل یعنی پیر کو ہوئیں۔ مگر آج بدھ کو سہلیوں کے گھر جاکر کالج نہ آنے کی وجہ جاننے کی کوشش میں معاملہ منظر عام پر آیا۔
پولیس کے مطابق اس خاندان کا تعلق چکمگلورو ضلع کے سکھرائے پٹنا سے ہے۔ لیکن وہ 30 سالوں سے میسور میں مقیم تھے۔پولس کے مطابق پورا خاندان اتوار کو ایک شادی میں شریک ہوا تھا، جہاں سے وہ اپنے آبائی گاوں سُکھرائے پٹنا بھی گئے تھے، جس کے بعد پیر کی صبح گھر واپس لوٹ آئے۔ وہ اُس رات سو گئے، لیکن صبح ہونے سے پہلے ہی وہ موت کی آغوش میں جاچکے تھے۔
نذر آباد پولیس نے بتایا کہ یہ واقعہ ایک چھوٹے سے مکان میں پیش آیا جس کی کھڑکیاں بند تھیں اور ہوا کا گذر گھر کے اندر جانے کا راستہ نہیں تھا۔
پولیس نے فارنسک سائنس لیبارٹری (FSL) ٹیم کے ساتھ جائے وقوعہ پر پہنچی اور لاشوں کو میسور میڈیکل کالج اینڈ ریسرچ انسٹی ٹیوٹ کے مردہ خانہ میں منتقل کرنے کا انتظام کیا۔
پولیس نے مقدمہ درج کر لیا ہے، اور میسورو سٹی پولیس کمشنر رمیش بنوت نذرآباد پولیس تھانہ کے اہلکاروں کے ساتھ جائے وقوع کا دورہ کرکے صورتحال کا جائزہ لیا ہے۔
