سان فرانسسکو،2؍جنوری (ایس او نیوز؍ایجنسی) ٹیسلا، اسپیس ایکس اور ٹوئٹر کے مالک ایلون مسک اپنی دولت میں سے 200 ارب ڈالر گنوانے والے پہلے شخص بن گئے ہیں۔

تفصیلات کے مطابق ٹیسلا، اسپیس ایکس اور ٹوئٹر کے مالک ایلون مسک نے ایک نیا ریکارڈ اپنے نام کرلیا، ایلون مسک دنیا کے پہلے ایسے شخص بن گئے ہیں جن کی دولت میں دو سو ارب ڈالر کی کمی واقع ہوئی ہے۔

اس سے قبل 51 سالہ مسک ایمیزون کے بانی جیف بیزوس کے بعد جنوری 2021 میں 200 بلین ڈالر سے زیادہ کی دولت کمانے والے دوسرے شخص بنے تھے۔

نومبر 2021 میں ایلون مسک کی دولت ریکارڈ 340 ارب ڈالرز تک پہنچی مگر ٹیسلا کے حصص میں حالیہ کمی کے بعد 2022 کے اختتام پر وہ گھٹ کر 137 ارب ڈالرز تک پہنچ گئی۔

انہوں نے اکتوبر میں 44 ارب ڈالرز میں ٹوئٹر کو بھی خریدا۔

اس سے قبل دسمبر 2022 میں ایلون مسک سے دنیا کے امیر ترین شخص کا اعزاز فرانس کے برنارڈ آرنلٹ نے چھین لیا تھا۔

برنارڈ آرنلٹ اس وقت 162 ارب ڈالرز کے ساتھ دنیا کے امیر ترین شخص ہیں , جس کے بعد 137 ارب ڈالرز کے ساتھ ایلون مسک دوسرے، 121 ارب ڈالرز کے ساتھ گوتم اڈانی تیسرے، 109 ارب ڈالرز کے ساتھ بل گیٹس چوتھے جبکہ 107 ارب ڈالرز کےساتھ وارن بفٹ 5 ویں نمبر پر ہیں۔