نائیجیریا میں مسافروں سے بھری کشتی حادثہ کا شکار، متعدد ہلاک، سیکڑوں لا پتہ
ابوجہ، 16/جنوری (ایس او نیوز/ایجنسی) نائیجیریا کے شمال مرکزی حصے میں ہنگامی سروس نے بتایا کہ گنجائش سے زیادہ مسافروں سے بھری ایک کشتی حادثہ کا شکار ہو گئی جس میں ۸؍ افرا د یقینی طور پرہلاک اور اندازاً ۱۰۰؍افراد لا پتہ ہو گئے ہیں۔ یہ کشتی کے جان لیوا حادثوں کے سلسلوں میں تازہ ترین حادثہ ہےجو حکام کی ناکامی کی جانب اشارہ کر رہا ہے ۔
نائیجیر ریاست کی ہنگامی انتظامیہ ایجنسی کے ترجمان ابراہیم اعودو کے مطابق پیر کو دوپہر میں مسافر نائیجیر ریاست کے بورگو ریاست سے پڑوسی ریاست کیبی کے بازار جارہے تھے تب گنجائش سے زیادہ مسافروں سے بھری ان کی کشتی نائیجیر ندی میں پلٹ گئی۔ اعودو نے کہا کہ ’’کشتی میں حد سے زیادہ مسافر سوار تھے جس کے سبب تیز ہواؤ ں کا زیادہ اثر پڑا۔ کشتی کی گنجائش ۱۰۰؍ مسافروں کی تھی لیکن اندازے کے مطابق اس میں مسافروں کی تعداد ۱۰۰؍ سے کہیں زیادہ تھی، ساتھ ہی اناج کی بوریوں نے غرق ہوتے وقت کشتی کو قابو کرنا مشکل بنا دیا تھا ۔‘‘
گائوں کے لوگ گمشدہ مسافروں کی تلاش میں مقامی تیراکوں اور ہنگامی حکام کی مددکر رہے ہیں جن میں زیادہ تعداد خواتین کی ہے۔ تاہم، اعودو یہ بتانے سے قاصر رہے کہ کل کتنےلوگ زندہ بچے ہیں۔
نائیجیریا کے دور دراز علاقوں میں کشتی کے حادثے عام سی بات ہوگئی ہے جہاں مقامی افراد اچھی اور قابل رسائی سڑکوں کی عدم موجودگی کے سبب اپنے کھیت کا سامان بازار تک ایسی کشتی میں لے جانے پر مجبور ہیں جو مقامی سطح پر تیار کی جاتی ہے۔
اگرچہ ان حادثوں میں ہلاک شدگان کی تعداد کا شمار میسر نہیں ہے البتہ گزشتہ سات مہینوں میں وہ پانچ حادثے شامل ہیں جن میں ہر حادثہ میں ۱۰۰؍ ہلاکتیں ہوئی ہیں ۔
پچھلے حادثہ میں گنجائش سے زیادہ مسافروں کی تعداد کو یا پانی میں کشتی کی نقل میں رکاوٹ کو، کشتی کی خستہ حالی کو مورد الزام ٹھہرایا گیا تھا۔اس کے جواب میں انتظامیہ نے کچھ اقدامات کو اپنانے کا اعلان کیا ہے جیسے لائف جیکٹ کی فراہمی یا پانی کے باقائدہ راستے کا تعین کرنا ،جن کا عام طور پراہتمام نہیں کیا جاتا ہے۔