کٹھمنڈو ، 24/اکتوبر (ایس او نیوز /ایجنسی) نیپال میں آج ایک بار پھر زلزلہ آنے سے لوگوں میں دہشت پھیل گئی ہے۔ میڈیا رپورٹس کے مطابق زلزلہ نیپال کی راجدھانی کاٹھمنڈو کے قریب آیا جس کی شدت ریکٹر اسکیل پر 5.2 بتائی جا رہی ہے۔ امریکی جیولوجیکل سروے کی جانب سے جاری کردہ بیان میں اس تعلق سے جانکاری دی گئی ہے۔

بتایا جا رہا ہے کہ زلزلہ کا مرکز 24.7 کلومیٹر زمین کی گہرائی میں تھا۔ اس زلزلہ کی وجہ سے کسی ہلاکت کی بر تو سامنے نہیں آئی ہے، لیکن کئی مکانات کو نقصان پہنچنے کی اطلاع ہے۔ ابتدائی رپورٹ میں بتایا جا رہا ہے کہ زلزلہ سے تقریباً 24 مکانات کو نقصان پہنچا ہے، تاہم اس میں کوئی جانی نقصان نہیں ہوا۔ حکام کا کہنا ہے کہ راجدھانی کاٹھمنڈو سے 60 کلومیٹر مغرب میں آنے والے زلزلے کے جھٹکے سے خطہ میں لینڈ سلائیڈنگ دیکھنے کو ملا۔ کاٹھمنڈو میں اس زلزلہ کا اثر لوگوں نے محسوس کیا جس کی وجہ سے مقامی افراد میں خوف و دہشت کا ماحول ہے۔

قابل ذکر ہے کہ گزشتہ روز بھی نیپال میں زلزلہ آیا تھا۔ نیشنل سیسمولوجی سینٹر کے مطابق 22 اکتوبر کو نیپال میں آئے زلزلہ کی شدت 6.1 تھی۔ زلزلے کے جھٹکے باگ متی اور صوبہ گنڈکی کے دیگر اضلاع میں بھی محسوس کیے گئے تھے۔ نیشنل ارتھ کوئک مانیٹرنگ اینڈ ریسرچ سنٹر کے مطابق صبح 7 بج کر 39 منٹ پر زلزلے کے جھٹکے محسوس کیے گئے تھے۔ اس زلزلے کا مرکز نیپال کے ضلع دھاڈنگ میں تھا۔