منشیات کیس میں بند ملزم والد کو گردہ عطیہ کرنا چاہتا ہے ، سپریم کورٹ نے دی اجازت
نئی دہلی،18؍ اکتوبر (آئی این ایس انڈیا) سپریم کورٹ نے اپنے بیمار والد کو گردہ عطیہ کرنے پر آمادگی ظاہر کرنے والے منشیات کیس کے ایک ملزم کو ضروری میڈیکل چیک اپ کیلئے جیل سے ہسپتال لے جانے کی اجازت دے دی ہے ۔ عدالت نے کہا کہ اگر ملزم گردے کا عطیہ دینے کے لیے مناسب پایا جاتا ہے اور متعلقہ سرکاری میڈیکل کالج کی کمیٹی ٹرانسپلانٹ کی منظوری دیتی ہے تو وہ مدھیہ پردیش ہائی کورٹ میں عبوری ضمانت کیلئے درخواست دے سکتا ہے۔عدالت اس پر ہمدردی سے غور کرے گی۔جسٹس اندرا بنرجی اور جسٹس جے کے مہیشوری کی بنچ نے ملزم کی درخواست کی سماعت کے دوران یہ تبصرہ کیا۔ درخواست میں مدھیہ پردیش ہائی کورٹ کے ایک حکم کو اس سال جون میں چیلنج کیا گیا ہے۔ ہائی کورٹ نے اس کیس میں ملزم کی درخواست ضمانت مسترد کر دی تھی۔درخواست گزار کے وکیل نے عدالت عظمیٰ کو بتایا کہ اس کے والد کے گردے نے کام کرنا چھوڑ دیا ہے، اسے گردے کے ٹرانسپلانٹ کی ضرورت ہے۔ وکیل نے بنچ کو بتایا کہ درخواست گزار اپنے بیمار والد کو اپنا گردہ عطیہ کرنا چاہتا ہے۔ریاستی حکومت کی جانب سے پیش ہوئے وکیل نے ضمانت کی درخواست کی مخالفت کرتے ہوئے کہا تھا کہ درخواست گزار کے خلاف الزامات سنگین ہیں۔ اس کے دوسرے بھائی اور بہنیں ہیں جو اپنے والد کی دیکھ بھال کر سکتے ہیں۔