ترکی اور شام میں اموات میں روزانہ اضافہ ہو رہا ہے ، 22 ہزار سے تجاوز کر گئیں
انقرہ/دمشق ، 11/فروری (ایس او نیوز؍ایجنسی ) ترکی اور شام میں پیر کو آنے والے تباہ کن زلزلے نے دونوں ممالک کے حالات بدتر بنا د ئیے ہیں۔ تازہ ترین اعداد و شمار کے مطابق زلزلے کے باعث دونوں ممالک میں جاں بحق ہونے والوں کی تعداد ۲۲؍ ہزار سے تجاوز کر گئی ہے جبکہ شدید ٹھنڈ ، برف باری اور بارش کی وجہ سے ریسکیو آپریشن میں مشکلات بھی پیش آرہی ہیں۔ صرف ترکی میں زلزلے کے سبب ۱۸؍ ہزار افراد لقمہ اجل بن گئے ہیں جبکہ ملک شام میں ساڑھے ۴؍ ہزار سے اموات کی اب تک تصدیق ہوئی ہے۔ راحتی کام بڑے پیمانے پر جاری ہیں اور راحتی کارکنوں کے بے لوث جذبے کی وجہ سے ہی صرف ترکی میں اب تک ۲۸؍ ہزار افراد کو ملبے سے نکالا بھی گیا ہے۔
ریسکیو آپریشن کیلئے ۶۰؍ ہزار سے زائد اہلکار تعینات کئے گئے ہیں ۔ ان میں مدد کے لئے پہنچنے والے ممالک کے اہلکار بھی شامل ہیں جبکہ ۷۰؍ ممالک نے اب تک ترکی اور ملک شام میں مدد کا ہاتھ بڑھایا ہے۔ شدید ٹھنڈ اور برف باری کے بارے میں اقوام متحدہ کا کہناہے کہ اگر بہت جلد ملبے سے بچائے گئے لوگوں اور دیگر متاثرین کی رہائش کا انتظام نہیں کیا گیا تو ہمیں ایک بہت بڑے المیے سے دوچار ہونا پڑسکتا ہے کیوں کہ شدید ٹھنڈ کی وجہ سے یہاں سیکڑوں لوگوں کو ہائپو تھرمیا (شدید ٹھنڈ کے سبب بدن کا درجہ حرارت خطرناک حد تک کم ہوجانا) ہو سکتا ہے۔