کم ہو رہا ہے کورونا کا خطرہ! دو ہفتے مسلسل اضافے کے بعدآرویلیومیں گراوٹ: آئی آئی ٹی مدراس کا تجزیہ
چنئی، 17؍جنوری (ایس او نیوز؍ایجنسی)گزشتہ 15 دنوں میں ہندوستان میں کورونا وائرس کے کیسوں میں مسلسل اضافہ ہو رہا ہے- گزشتہ 24 گھنٹوں میں ملک میں کورونا کے 2.71 لاکھ نئے کیس سامنے آئے ہیں - یہ تعداد ایک دن پہلے پائے جانے والے نئے کیسوں سے صرف تین ہزار زیادہ ہے- ایسے میں زیادہ تر تجزیہ کار یہ مان رہے ہیں کہ ہندوستان میں کورونا کا عروج جلد ہی آسکتا ہے- دریں اثنا آئی آئی ٹی مدراس کے تجزیہ نے ایک اور راحت کی خبر دی ہے- اس کے مطابق دسمبر 2020ء اور جنوری 2021 کے دو ہفتے میں ملک میں ’آر ویلیو‘ میں مسلسل اضافے کے بعد گزشتہ ہفتے یعنی 7 سے 13 جنوری کے دوران پہلی بار اس میں کمی ریکارڈ کی گئی- اس وقت ملک میں اوسط آرویلیو2.2 ہے-آر ویلیو کسی متاثرہ کی دوسروں کو متاثر کرنے کی صلاحیت کا اعداد و شمار ہے- یعنی اگر کورونا سے متاثرہ کی آر ویلیو ایک ہے تو اس کی طرف سے کسی دوسرے شخص کے متاثر ہونے کا خطرہ ہے- دوسری طرف اگر کسی شخص کی آر ویلیو تین ہے تو وہ تین لوگوں کیلئے خطرہ بن سکتا ہے- عام طور پر کورونا کے بڑے پیمانے پر پھیلاؤ کے دوران انسانوں کی آر ویلیو زیادہ ہوتی ہے اور اس بڑھتے ہوئے اعداد و شمار کو روکنے کیلئے حکومتیں پابندیاں‘ کرفیو یا لاک ڈاؤن جیسے اقدامات کرتی ہیں -
