چین نے امریکہ سے کہا؛ مشرق وسطیٰ میں بحریہ کی تعیناتی کا ’بے بنیاد پروپیگنڈہ‘ بند کرے
بیجنگ ، 23/اکتوبر (ایس او نیوز /ایجنسی) چین نے امریکہ سے کہا ہے کہ وہ اسرائیل-غزہ تنازعہ کے درمیان مشرق وسطیٰ میں چینی جنگی جہازوں کی تعیناتی کے بارے میں بے بنیاد پروپیگنڈا کرنا بند کرے۔چینی سفارت خانے کے ترجمان لیو پینگیو نے اتوار کو ایک بیان میں اس بات کی اطلاع دی۔
میڈیا رپورٹس کے مطابق، گائیڈڈ میزائل ڈسٹرائر سمیت چھ چینی جنگی جہاز پچھلے ہفتے سے مشرق وسطیٰ میں تعینات کیے گئے ہیں، جن میں عمان کی بحریہ کے ساتھ مشترکہ مشق بھی شامل ہے۔
مسٹر لیو نے بیان میں کہا ’’چینی پیپلز لبریشن آرمی نیوی کا بحری بیڑا اسکارٹ مشن کے لیے روانہ ہوا اور متعلقہ ممالک کے دوستانہ دورے کر رہا ہے۔متعلقہ فریقین کو حقائق کا احترام کرنا چاہیے اور بے بنیاد پروپیگنڈا بند کرنا چاہیے۔‘‘
دریں اثنا، پنٹاگن کے مطابق، ایران کی ’’پراکسی فورسز‘‘ کی طرف سے خطے میں امریکی افواج پر بڑھتے ہوئے حملوں کے درمیان، امریکہ یو ایس ایس آر ڈوائٹ ڈی آئیسین ہاور کیریئر اسٹرائیک گروپ کو خلیج فارس میں تعینات کر رہا ہے۔ اس کے علاوہ یو ایس ایس آر گیرالڈ آر فورڈ کیریر اسٹرائک گروپ کو مشرقی بحیرہ روم میں تعینات کیا گیا ہے تاکہ کسی بھی تیسرے فریق کو روکنے کے لیے کام کیا جا سکے جو اسرائیل کے خلاف تنازع میں ملوث ہونے پر غور کر سکتا ہے۔
