چئیترا کنداپورا فریب کاری معاملہ کے اہم ملزم ہالاشری سوامی اوڈیشہ میں گرفتار
بینگلورو ، 19/ ستمبر (ایس او نیوز) بی جے پی سے اسمبلی ٹکٹ دلانے کے نام پر چئیترا کنداپورا گینگ نے جو کروڑوں روپوں کی فریب کاری کی تھی اس معاملے کے ایک اہم اور مفرور ملزم ہالاشری مٹھ کے ابھینَوا سوامی کو سی سی بی پولیس نے اوڈیشہ کے کٹک شہر سے گرفتار کر لیا ۔
معلوم ہوا ہے کہ ہالاشری سوامی کو اوڈیشہ پولیس کی مدد سے چلتی ٹرین میں گرفتار کیا گیا ہے اور وہاں سے بینگلورو لایا جا رہا ہے ۔
خیال رہے کہ کروڑوں روپے کی فریب کاری معاملے میں کلیدی ملزم چئیترا کنداپورا کی گرفتاری کے بعد گزشتہ دس دنوں سے لنگایت فرقہ کے ہالا شری سوامی لاپتہ ہوگئے تھے اور ان کی طرف سے عبوری ضمانت حاصل کرنے کی کوشش کی جا رہی تھی . اس دوران سی سی بی پولیس کی کارکردگی پر بھی سوال اٹھائے جا رہے تھے ۔
اس سے قبل چئیترا نے پولیس کسٹڈی کے دوران دعویٰ کیا تھا کہ ہالاشری سوامی کو گرفتار کیے جانے پر فریب کاری کے اس معاملے میں بہت سی بڑی شخصیات کے نام سامنے آئیں گے ۔
پولیس کا کہنا ہے کہ چئیترا کی میڈیکل رپورٹس نارمل آئی ہیں اور اسے مرگی کا دورہ جو پڑا تھا وہ چئیترا کے ذریعے رچا گیا ایک ناٹک تھا اور اس نے مرگی کے دوران منھ سے جھاگ نکلتے ہوئے دکھانے کے لئے کسی طرح ایک صابن کی ٹکیہ کا استعمال کیا تھا اور وہی جھاگ اس کے منھ سے نکلا تھا ۔ لہٰذا سی سی بی پولیس پر اس بات کے لئے بھی سوال اٹھ رہے ہیں کہ جب اس کی میڈیکل رپورٹ نارمل تھی تو پھر اسے چار دنوں تک علاج کے نام پر اسپتال میں کیوں رکھا گیا تھا ۔ اس کے علاوہ چنّا نائک نامی ملزم کو بھی پولیس نے اسی وقت گرفتار کیا تھا جب اس نے خود میڈیا کے سامنے پیش ہوا تھا ۔
