ڈھاکہ،6/اگست (ایس او نیوز/ایجنسی) بنگلہ دیش میں گزشتہ 24 گھنٹوں کے دوران ڈینگی سے مزید 10 اموات کی اطلاع ملی ہے، جس کے بعد مرنے والوں کی تعداد 300 سے تجاوز کر گئی ہے جبکہ اس بیماری کے 2,495 معاملے سامنے آئے ہیں۔ وزارت صحت نے یہ اطلاع دی۔

وزارت صحت و خاندانی فلاح وبہبود کے تحت ملک کے ڈائریکٹوریٹ جنرل آف ہیلتھ سروسز ( ڈی جی ایچ ایس) کے اعداد و شمار کے مطابق اس سال اب تک ملک میں تصدیق شدہ انفیکشن کی کل تعداد 63,968 ہو گئی ہے، جبکہ جنوری سے اب تک مرنے والوں کی تعداد 303 ہو گئی ہے۔

ڈی جی ایچ ایس نے کہا کہ جنوبی ایشیائی ملک میں گزشتہ ماہ ڈینگی کے کیسز میں سب سے زیادہ اضافہ دیکھا گیا جس میں 43,854 نئے انفیکشن اور 204 اموات ہوئیں۔ جون-ستمبر مون سون کا دورانیہ بنگلہ دیش میں ڈینگی بخار کا موسم ہے، جسے مچھروں سے پھیلنے والی بیماری کے لیے ایک بڑا خطرہ والا ملک سمجھا جاتا ہے۔