ممبئی یکم جولائی (ایس او نیوز) تیز رفتار دوڑتی بس حادثہ کا شکار ہونے سے بس پر سوار 26 لوگوں کی موت واقع ہوگئی اور آٹھ لوگ زخمی ہوگئے۔ حادثہ مہاراشٹرا کے ناگپور سے 135 کلومیٹر دور بولڈھانا ضلع کے پمپلکھوٹا قصبہ کے قریب مہاشٹرا ایکسپریس وے پر آدھی رات قریب ڈیڑھ بجے پیش آیا ۔

میڈیا میں آئی خبروں کے مطابق بس پر 30 مسافر سوار تھے جبکہ بس پر دو ڈرائیور اور ایک عملہ بھی تھا۔ بولڈھانا ایس پی سنیل کڈسنے نے میڈیا کو بتایا کہ تیز رفتار بس کا پہلے ایک ٹائر پنکچر ہوگیا جس کے نتیجے میں بس بے قابو ہوکر الٹ گئی جس کےبعد بس میں آگ لگ گئی۔ ایس پی نے بتایا کہ حادثہ میں بچنے والوں میں ڈرائیور بھی شامل ہے۔ بعض رپورٹوں کے مطابق بس پہلے ایک کھمبے سے ٹکرا گئی تھی، پھر سڑک کے ڈیوائیڈر سے ٹکرا گئی جس کے ساتھ ہی بس کے ڈیزل ٹینکر میں دھماکہ ہوا اور پوری بس شعلہ پوش ہوگئی۔ ایک اور رپورٹ کے مطابق بس جب سڑک کے بیچوں بیچ سیمنٹ کے ڈیوائیڈر سے ٹکرا کر الٹ گئی، تو باہر نکلنے کا دروازہ بس کے نیچے دب گیا اور لوگوں کو باہر نکلنے کا راستہ نہیں ملا۔ جیسے ہی بس کو آگ لگی لوگ بس کے اندر ہی زندہ جھلس گئے۔   حادثے کے بعد کچھ مسافروں نے شیشہ توڑ کر باہر نکلنے کی کوشش کی۔ جبکہ باہر نکلنے میں کامیاب ہونے والوں مزید لوگوں کو باہر نکالنے کی کوشش کی۔ حادثہ ناگپور ممبئی سمرودھی ہائی وے پر 1.26 منٹ کو پیش آیا۔  

ذرائع کے مطابق بس ناگپور سے پونا جانے کے لئے نکلی تھی، لیکن قریب 135 کلو میٹر کا سفر ہی طئے ہوا تھا کہ حادثہ کا شکار ہوگئی۔

پولس کے الرٹ ہونے کے بعد، مقامی اور ہائی وے ٹریفک پولیس اور دیگر سرکاری اداروں کے اہلکار بھی موقع پر پہنچ گئے اور بس پر موجود لوگوں کو باہر نکال کر قریبی اسپتال منتقل کیا گیا۔ ابتداء میں 25 افراد کے مرنے کی خبر تھی، بعد میں مزید ایک مسافر نے دم توڑدیا۔ بتایا گیا ہے کہ بہت زیادہ جھلس جانے کی وجہ سے مسافروں کی شناخت میں دقت پیش آرہی ہے۔

دریں اثنا، ریاستی حکومت نے متاثرین کے لواحقین کے لیے 5 لاکھ روپے کے معاوضے کا اعلان کیا ہے۔

اپوزیشن لیڈر اور این سی پی لیڈر اجیت پوار نے حادثے میں مرنے والوں کے تئیں تعزیت کی لیکن انہوں نے بتایا کہ مہاراشٹرا کے سمرودھی ایکسپریس وے پر افتتاح کے بعد سے ہی حادثات میں اضافہ ہورہا ہے۔

اپنی تعزیت پیش کرتے ہوئے، وزیر اعظم نریندر مودی نے مرنے والوں کے لواحقین کے لیے 2 لاکھ روپے کے ایکس گریشیا کا اعلان کیا ہے۔ ٹویٹ کرتے ہوئے وزیر اعظم مودی نے کہا کہ "بلڈھانہ، مہاراشٹرا میں ہوئے تباہ کن بس حادثے سے میں بہت دکھی ہوں۔ میری دعائیں ان لوگوں کے خاندانوں کے ساتھ ہیں جنہوں نے اپنی جانیں گنوائیں۔ میری دعا ہے کہ زخمیوں کو جلد صحت یاب کرے۔ مودی نے یہ بھی ٹویٹ میں لکھا کہ مقامی انتظامیہ متاثرین کو ہر ممکن مدد فراہم کر رہی ہے۔