ہوناور، 30 / مارچ (ایس او نیوز) کاسرکوڈ ٹونکا کے بندرگاہ علاقے میں ضلع انتظامیہ کی طرف سے 29 مارچ سے 5 اپریل تک دفعہ 144 کے تحت امتناعی احکامات نافذ کر دئے گئے ہیں جس سے یہ شبہ ہو رہا ہے کہ شائد مجوزہ تجارتی بندرگاہ کا  تعمیراتی کام شروع ہونے جا رہا ہے ۔
    
خیال رہے کہ نجی تجارتی بندرگاہ کی تعمیر کے خلاف مقامی افراد اور ماہی گیروں نے گزشتہ دو تین سال سے احتجاج شروع کر رکھا ہے اور جب بھی یہاں تعمیراتی کام شروع ہوتا ہے تو احتجاجی مظاہرین سڑکوں پر آ جاتے ہیں اور اس کے بعد ٹھیکیدار کمپنی کے ملازمین ، پولیس اور انتظامیہ کے درمیان زبانی جھڑپوں کے علاوہ تشدد کے واقعات بھی پیش آتے ہیں ۔ 
    
اسی پس منظر میں ایک طرف ماہی گیروں اور مقامی افراد نے درپیش پارلیمانی انتخاب کے بائیکاٹ کا اعلان کر رکھا ہے تو دوسری طرف ضلع انتظامیہ کی طرف سے مفاہمت کی کوششیں بھی ہوئی جو ناکام ہوگئیں ۔ مقامی لوگوں کا کہنا ہے کہ اب شائد انتخابی ضابطہ اخلاق جاری ہونے کے بعد ضلع انتظامیہ اس موقع سے فائدہ اٹھا کر ٹھیکیدار کمپنی کو نجی بندرگاہ سے متعلقہ سڑک کا ادھورا کام مکمل کرنے کا موقع فراہم کرنا چاہتی ہے ، اس لئے مقامی طور پر ایک ہفتے کے لئے امتناعی احکامات نافذ کیے گئے ہیں ۔