ನಮ್ಮ ಸಾಂಸ್ಕ್ರತಿಕ ಶ್ರೀಮಂತಿಕೆ ಬಹುಶ್ರೀಮಂತವಾದದು ಪರಂಪರಾಗತವಾಗಿ ಬಂದ ಮೌಲ್ಯಗಳು ಯಕ್ಷಗಾನದ ಕಲೆಯ ಮೂಲಕ ಅನಾವರಣ ಗೊಳುತ್ತಿದ್ದು ಅದರ ಹಿಂದೆ ಶ್ರಮಿಸುವ ಕೈಗಳನ್ನು ಗುರುತಿಸಿ ಗೌರವಿಸುವುದು ಪ್ರಶಂಸನೀಯವಾದುದು ಎಂದು ಡಾ.ಶಿವಾನಂದ ನಾಯಕ ತಿಳಿಸಿದರು. ದಿನಾಂಕ. 18.06.2017 ರಂದು ಇಡಗುಂಜಿಯ ಮಹಾಗಣಪತಿ ಯಕ್ಷಗಾನ ವೇಷಭೂಷಣ ಮಂಡಳಿ(ರಿ) ಆಡುಕುಳ ಹಾಗೂ ಕನ್ನಡ ಮತ್ತು ಸಂಸ್ಕ್ರತಿ ಇಲಾಖೆ ಕಾರವಾರ ಇವರ ಸಹಯೋಗದಲ್ಲಿ ನಡೆದ ಸಂಘದ 8ನೇ ವರ್ಷದ ವಾರ್ಷಿಕೋತ್ಸವ ಹಾಗೂ ಸನ್ಮಾನ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಮಾತನಾಡುತ್ತಾ ವಿವಿಧ ಯಕ್ಷಗಾನ ಮೇಳಗಳಿಗೆ ವೇಶ ಭೂಷಣ ಪರಿಕರಗಳನ್ನು ಅಚ್ಚುಕಟ್ಟಾಗಿ ಮಾಡಿಕೊಡುತ್ತಿರುವ ಭಾಸ್ಕರ ಗೌಡ ಹಾಗೂ ಅವರ ಕುಟುಂಬದವರ ಕಾರ್ಯವನ್ನು ಅಭಿನಂದಿಸಿ ಯಕ್ಷಗಾನ ಕಲಾವಿದರನ್ನು ಗೌರವಿಸುವ ಪರಂಪರೆ ನಿರಂತರವಾಗಿ ಮುಂದುವರೆಯಲಿ ಎಂದು ಆಶಿಸಿದರು.
         ಈ ಸಂದರ್ಭದಲ್ಲಿ ಮಂಡಳಿಯ ಅಧ್ಯಕ್ಷರಾದ ಶ್ರೀ ಭಾಸ್ಕರ ಗೌಡ ಹಾಗೂ ಕುಟುಂಬದವರು ಖ್ಯಾತ ಯಕ್ಷಗಾನ ಹಾಸ್ಯಕಲಾವಿದರಾದ ಶ್ರೀಧರ ಹೆಗಡೆ, ಕಾಸರಕೊಡು, ಹಿರಿಯ ಚಂಡೆವಾದಕ ಕಲಾವಿದ ಶ್ರೀ ವೆಂಕಪ್ಪ ಮಂಜು ಭಂಡಾರಿಯವರನ್ನು ಹಾಗೂ ಕಲಾವಿದರೂ, ಪ್ರಾಂಶುಪಾಲರಾದ ಡಾ.ಶಿವಾನಂದ ನಾಯಕರನ್ನು ಸನ್ಮಾನಿಸಿ ಗೌರವಿಸಿದರು.
    ನಂತರ ಹಿರಿಯ ಭಾಗವತರಾದ ಕೃಷ್ಣ ಭಂಡಾರಿ, ಉಮೇಶ ತಲಕೋಡ ಹಾಗೂ ಅತಿಥಿ ಕಲಾವಿದರ ಸಹಕಾರದಲ್ಲಿ  ಯಕ್ಷಗಾನ ಪ್ರದರ್ಶನ ನಡೆಯಿತು. ಕಾರ್ಯಕ್ರಮವನ್ನು ಎಮ್.ಪಿ.ಭಂಡಾರಿಯವರು ಅಚ್ಚುಕಟ್ಟಾಗಿ ನಿಭಾಯಿಸಿದರು. 
                
 
 
ವರದಿ.ಡಾ.ಶಿವಾನಂದ.ವಿ.ನಾಯಕ.