ಭಟ್ಕಳ: ತಾಲೂಕಿನಾದ್ಯಂತ ಜಾಲದಂತೆ ಹಬ್ಬಿಕೊಂಡಿದ್ದ ಅಕ್ರಮ ಸಾರಾಯಿ ಮಾರಾಟ ಹಾಗೂ ಮಟಕಾ ದಂಧೆಯ ವಿರುದ್ಧ ಸಮರ ಸಾರಿರುವ ಎಎಸ್‍ಪಿ ನಿಖಿಲ್, ಇಲ್ಲಿನ ಪಟ್ಟಭದ್ರ ಹಿತಾಸಕ್ತಿಗಳ ಕೆಂಗಣ್ಣಿಗೆ ಗುರಿಯಾಗಿರುವ ಮಾಹಿತಿ ಹೊರ ಬಿದ್ದಿದೆ.

ತಾಲೂಕಿನ ವಿವಿಧ ಗ್ರಾಮಗಳಲ್ಲಿ ಅಕ್ರಮ ಸಾರಾಯಿ ಮಾರಾಟದ ಜಾಲವನ್ನು ಒಂದೊಂದಾಗಿ ಕೆದಕಿ ಸಾಗುತ್ತಿರುವ ಅವರು, ಈ ಬಗ್ಗೆ ಸಾರ್ವಜನಿಕರಿಂದ ದೂರು ಬಂದರೆ ಆಯಾ ಭಾಗದ ರಕ್ಷಣಾ ಹೊಣೆ ಹೊತ್ತಿರುವ, ಎಸ್‍ಐ, ಪೊಲೀಸ್ ಸಿಬ್ಬಂದಿಗಳನ್ನೇ ಹೊಣೆಗಾರರನ್ನಾಗಿ

ಮಾಡಬೇಕಾಗುತ್ತದೆ ಎಂದು ಸಭೆ ಕರೆದು ಎಚ್ಚರಿಸಿರುವ ಮಾಹಿತಿ ಲಭಿಸಿದೆ. ಮಟಕಾದ ವಿರುದ್ಧವೂ ಮುಗಿ ಬಿದ್ದಿರುವ ಅವರು, ಮಟಕಾ ಕುಳಗಳಿಗೂ ಬೆವರು ಇಳಿಸಿದ್ದಾರೆ. ಈ ಸಂಬಂಧ ವಿವಿಧ ರಾಜಕೀಯ ಪಕ್ಷಗಳ ಕೆಲವು ಮುಖಂಡರು, ದಂಧೆಕೋರರು ಎಎಸ್ಪಿಯವರನ್ನು ಪುಸಲಾಯಿಸುವ ಪ್ರಯತ್ನ ನಡೆಸಿದರಾದರೂ ಪ್ರಯತ್ನ ಸಫಲವಾಗಿಲ್ಲ. ಕೆಲವು ಧುರಿಣರುಗಳಿಗೆ ತಮ್ಮ ಕೆಲಸಕ್ಕೆ ಅಡ್ಡ ಬರದಂತೆಯೂ ತಾಕೀತು ಮಾಡಿರುವ ಮಾಹಿತಿಯೂ ಹರಿದಾಡುತ್ತಿದೆ. ಎಎಸ್ಪಿಯವರ ಈ ಕಟ್ಟುನಿಟ್ಟಿನ ನಡೆ ಸಾರಾಯಿ, ಮಟಕಾ ಕುಳಗಳಲ್ಲದೇ ಕೆಲ ಪೊಲೀಸ್ ಅಧಿಕಾರಿಗಳಿಗೂ ತಲೆ ನೋವನ್ನು ತಂದಿದೆ. ಮೂಲಗಳ ಪ್ರಕಾರ ಭಟ್ಕಳಕ್ಕೆ ಬಂದ 15 ದಿನಗಳಲ್ಲಿಯೇ ಎಎಸ್ಪಿಯವರನ್ನು ಭಟ್ಕಳದಿಂದ ವರ್ಗಾವಣೆ ಮಾಡಿಸುವ ಪ್ರಯತ್ನವೂ ನಡೆದಿದ್ದು, ಇದಕ್ಕೆ ಎಎಸ್ಪಿ ಡೋಂಟ್ ಕೇರ್ ಎಂದಿದ್ದಾರೆ. ಈ ಬಗ್ಗೆ ಪ್ರತಿಕ್ರಿಯಿಸಿರುವ ಎಎಸ್‍ಪಿ ನಿಖಿಲ್, ನಾನೂ ಇದನ್ನು ಸಾರ್ವಜನಿಕರಿಂದ ತಿಳಿದುಕೊಂಡಿದ್ದೇನೆ. ನಾವು ಸರಕಾರಿ ಅಧಿಕಾರಿಗಳು, ಸರಕಾರ ಎಲ್ಲಿ ಹೇಳುತ್ತದೆಯೋ ಅಲ್ಲಿ ಹೋಗಿ ಕೆಲಸ ಮಾಡುವುದಾಗಿ ತಿಳಿಸಿದ್ದಾರೆ.