بھٹکل:یکم؍اکتوبر(ایس اؤ نیوز) تعلقہ بھر میں مکڑی کے جال کی طرح پھیلے غیر قانونی شراب سپلائی اورجوے کے  دھندوں کے خلاف جنگی پیمانے پر کارروائی کررہے اے ایس پی نکھیل مفاد پرستوں کے نشانے پرآنے کی اطلاعات موصول ہوئی ہیں۔

تعلقہ کے مختلف دیہاتوں میں غیر قانونی شراب سپلائی کا دھندہ زوروں پرہے ، اے ایس پی نکھیل ایک ایک معاملے کو لے کر آگے بڑھ رہے ہیں، ذرائع نے خبردی ہے کہ حال ہی میں ایک میٹنگ کے دوران اے ایس پی نے افسران کو سخت انتباہ دیاہے کہ  اگر کسی علاقے کے لوگ اس سلسلے میں کوئی شکایت کرتے ہیں تو متعلقہ افسران کو ہی ذمہ دار ماناجائے گا۔ جوے کو لے کر سخت کارروائی کرتےہوئے انہوں نے جوے کا دھندہ کرنےو الوں کا پسینہ اتار دیا ہے، بتایاجارہاہے کہ اس سلسلے میں مختلف سیاسی پارٹیوں کے کچھ لیڈران اور دھندہ کرنےو الوں نے اے ایس پی کو سمجھانےکی کوشش بھی کی ہے مگر وہ   ناکام  ثابت ہوئی ہے ۔

 ذرائع کی مانیں تو انہوں نے بعض عوامی نمائندوں سے  سے صاف صاف کہا ہے کہ وہ اپنا کام کریں اور مجھے اپنا کام کرنے دیں اور اس میں اپنی ٹانگ نہ اڑائیں۔ بتایا جارہاہے کہ  اے ایس پی کی سخت وارننگ  اور ان کے  صاف وشفاف چلن سے چند پولس افسران کو بھی ناراضگی ہوئی ہے۔ خبر ملی ہے کہ  بھٹکل میں اے ایس پی کا عہدہ سنبھالے صرف 15دن میں انہوں نے شراب سپلائی اور جوئے کے غیر قانونی اڈوں کے خلاف  جس طرح کی کاروائی کی ہے، اُس سے ناراض بعض سیاسی لیڈران   ان کا تبادلہ  کرنے  کی کوششوں میں لگ گئے ہیں ۔

اس تعلق سے اخبارنویسوں کے پوچھے گئے سوال کا واضح جواب دیتے ہوئے اے ایس پی نے کہا کہ اُنہیں تبادلہ کی کوئی فکر نہیں ہے۔ انہوں نے کہا کہ ہم سرکاری افسران ہیں، سرکار جہاں بولے گی وہاں جاکر اپنا کام کریں گے۔