جمعےۃ علماء گجرات کی ورکنگ کمیٹی کے اجلاس میں ۳۳؍ویں اجلاس عام میں مکمل تعاون کی یقین دہانی،نیز دلت مسلم اتحاد کی ضرورت پر زور دیا 

احمد آباد، 31؍اگست(ایس او نیوز/آئی این ایس انڈیا)گجرات میں دلتوں اور مسلم اقلیت کو ہراساں کرنے کے بڑھتے واقعات پر گہری تشویش کا اظہار کرتے ہوئے جمعےۃ علماء نے یہ اعلان کیا ہے کہ وہ جلد ہی گجرات کے گورنر سے ملاقات کرکے اس سلسلے میں سرکار وانتظامیہ کی بے توجہی کی شکایت کرے گی ۔آج یہاں جمعےۃ علماء گجرا ت کی مجلس عاملہ کے اجلاس میں دلتوں کے بعد اب عیدالاضحی کے موقع پر جانوروں کی خرید وفروخت میں مسلم اقلیت کے ساتھ مارپیٹ ، یہاں تک کہ بکرا وغیرہ کی خریداری میں رخنہ اندازی اور اس سے متعلق پولس کے متعصبانہ کردار پر سوال اٹھا یا گیا اور فیصلہ کیا گیا کہ گورنر سے ملاقات کرکے مثبت اور ضروری اقدام کی جانب توجہ لائی جائے ۔ مولانا رفیق احمد مظاہری صدر جمعےۃ علماء گجرات نے کہا کہ جمعےۃ علماء ہند اس سلسلے میں پہلے ہی متعلقہ حکام سے رابطے میں ہے ، مگر صورت حال جس قدر نازک بنانے کی کوشش کی جارہی ہے، اس کے مدنظر مزید اقدامات کی ضرورت ہے ۔مجلس عاملہ نے نیز اجمیر شریف میں ہونے والے جمعےۃ علماء ہندکے ۳۳؍ویں اجلاس عام کے سلسلے میں بھر پور تعاون کا اعلان کیااور کہا کہ اجلاس کے جو مقاصد ہیں ، وہ درحقیقت دور حاضرکا اہم تقاضا ہے ، اس لیے جمعےۃ علماء گجرات اس اجلاس کی کامیابی کے لیے ہر طرح کی مدد پیش کرنے کو تیار ہے۔دلتوں اور قبائلی برادریوں کے دکھ میں برابر کی شرکت کا اعلان کرتے ہوئے مجلس عاملہ نے کہا کہ اونا میں ہوئے حادثہ کے بعد مختلف جگہوں پر منعقد احتجاج میں جمعےۃ علماء گجرات کے ممبرا ن نے دیگر افراد کے ساتھ شانہ بشانہ کھڑے ہو کر ایک مثال قائم کی ہے ۔ مجلس عاملہ نے جمعےۃ علما ء ہند کے جنرل سکریٹری مولانا محمود مدنی کے ذریعے دلت ومسلم اتحاد قائم کرکے مظلوموں کے لیے سماجی جد وجہد شروع کرنے کی ستائش بھی کی ۔اجلاس میں مہسانہ فساد کے مجرموں کو سزا ملنے پر بھی اطمینان کے ساتھ اس امید کا اظہار کیا گیا کہ دیگر معاملات میں بھی جمعےۃ علماء کو انصاف ملے گا ، اس کے علاوہ دفتری امور سے متعلق بھی فیصلے ہوئے ، خاص طور سے جمعےۃ علماء گجرات کے نئے دفتر کے سلسلے میں فیصلہ ہوا کہ اب نیا دفتر پانچ کنواں احمد آباد میں ہو گا ۔ اجلاس کی صدارت مولانا رفیق احمد مظاہری نے کی، جب کہ مہمان خصوصی کے طور پر مرکز سے مولانا حکیم الدین قاسمی سکریٹری جمعےۃ علما ء ہند شریک ہوئے ۔ اجلاس میں ان بزرگوں کے علاوہ جن اہم لوگوں نے شرکت کی ان کے نام حسب ذیل ہیں: پروفیسر نثار احمد انصاری ناظم اعلی جمعےۃ علماء گجرات،شفیع بھائی گجراتی ، حاجی فہیم، مفتی اسجد قاسمی، مفتی عمران بڑودہ، مولانا شوکت ملا، حافظ یونس، مولانا محسن ، حافظ سہیل کنجری ، حافظ الطاف، ابراراحمد رکھیال،حاجی شاہد راجپوت، حاجی دولت خاں، حافظ بشیر احمد ، مفتی ارشد احمد آباد،مفتی عارف کالوپور، شعیب احمد وغیرہ