نئی دہلی: 29/مارچ(ایس او نیوز/ آئی این ایس انڈیا) حکومت نے آج کہا کہ دہلی میں اس سال خواتین کے خلاف ہونے والے جرائم میں کمی آئی ہے اور پولیس ان معاملات کو نمٹانے میں چاق وچوبند رہتی ہے۔مرکزی وزیرمملکت برائے امور داخلہ ہنس راج گنگارام اہیر نے اضافی سوالات کے جواب میں راجیہ سبھا کو بتایا کہ عصمت دری کے 2155معاملات میں سے 2145 معاملات حل ہوگئے اور صرف 10 معاملات ہی نہیں سلجھ پائے ہیں۔انہوں نے کہا کہ سال 2015 میں خواتین کے خلاف جرائم سے متعلق 12736 معاملات درج کئے گئے۔ سال 2016 میں 11295 معاملات درج کئے گئے۔وزیر نے کہا کہ اس سال 28 فروری تک کے اعداد و شمار کے مطابق خواتین کے خلاف ہوئے جرائم کے 1332 معاملات درج کئے گئے۔انہوں نے بتایا کہ دہلی کے مہرولی میں عصمت دری کا معاملہ پانچ سال سے زیر التوا ہے۔ اس معاملے میں ملزم اشوک کمار نامی شخص کو پولیس کی بہترین کوششوں کے باوجود گرفتار نہیں کیا جا سکا ہے۔سماج وادی پارٹی کی جیا بچن نے پوچھا کہ پولیس اہلکاروں کی طرف سے خواتین سے بدتمیزی پر کیا کارروائی کی جاتی ہے۔اس پر وزیر نے کہا کہ شکایت ملنے پر پولیس اہلکاروں کے خلاف یقینی طور پر کارروائی ہوتی ہے۔