یلاپور ایم ایل اے ہیبار نے دیا بی جے پی کو شاک ؛ کیا ہیبّار کانگریس میں شامل ہوں گے ؟
یلاپور 28 / فروری (ایس او نیوز) پچھلے کچھ دنوں سے یلاپور حلقہ کے ایم ایل اے شیو رام ہیبار کے تعلق سے افواہیں چل رہی تھیں کہ وہ بی جے پی سے واپس کانگریس میں لوٹنے کے لئے پر تول رہے ہیں ۔ اب شیورام ہیبار نے راجیہ سبھا کے لئے اراکین کے انتخاب کے موقع پر اسمبلی سے غیر حاضر رہتے ہوئے بی جے پی کو براہ راست شاک دے دیا ہے ۔
خیال رہے کہ اسمبلی سے راجیہ سبھا کو اراکین منتخب کرنے کا عمل کل جب اسمبلی میں پورا کیا گیا تو الیکشن کے وقت تمام اراکین اسمبلی میں موجود رہنے اور پارٹی کے امیدوار کو ووٹ دینے کی تاکیدی ہدایت بی جے پی کی طرف سے جاری کی گئی تھی مگر بی جے پی کے رکن اسمبلی ایس ٹی سوم شیکھر نے پارٹی وہپ کی خلاف ورزی کرتے ہوئے کانگریسی امیدوار کو اپنا ووٹ دیا جبکہ شیو رام ہیبار نے اسمبلی سیشن سے غیر حاضر رہنے کو ترجیح دی ۔ اس طرح ان دونوں اراکین اسمبلی نے بی جے پی سے دور ہونے کے امکانات کا اشارہ کر دیا ۔
اسمبلی سے راجیہ سبھا کے لئے چار اراکین کو منتخب کرنا تھا جس میں کانگریس کے تین امیدوار پارٹی کی اسمبلی میں قوت کے بل پر جیت سے ہمکنار ہوئے ۔ کانگریسی خیمے سے ووٹ گھسیٹنے اور ووٹوں کے حساب و کتاب کو الٹ پلٹ کرنے کے لئے جنتا دل ایس نے بی جے پی کے ساتھ مل کر ایک چال چلی تھی اور اپنا پانچواں امیدوار میدان میں اتارا تھا ۔ لیکن یہ چالاکی کام نہیں آئی بلکہ الٹے بی جے پی کے خیمے میں ہی کانگریس نے دراڑیں ڈال دیں ۔
توقع کی جا رہی ہے کہ شیورام ہیبار اور ایس ٹی سوم شیکھر لوک سبھا الیکشن کے موقع پر باضابطہ طور پر کانگریس میں شامل ہو جائیں گے ۔ شیورام ہیبار کے بارے میں سمجھا جا رہا ہے کہ خود انہیں یا ان کے بیٹے کو کانگریس کی طرف سے کینرا حلقہ سے پارلیمانی الیکشن میں امیدوار بنائے جانے کے بھی امکانات ہیں۔
شیورام ہیبار کے لاپتہ ہونے کی شکایت :یلاپور پٹن پنچایت کے رکن سومیشور نائک نے یلاپور پولیس اسٹیشن میں شکایت درج کروائی ہے کہ منگل کے دن جب راجیہ سبھا الیکشن ہوا تو اس دن صبح سے شیورام لاپتہ ہوگئے ہیں ۔ منگل کے دن صبح ان کا فون سوئچ آف چل رہا ہے اور کسی سے ان کا رابطہ نہیں ہو رہا ہے اس لئے پولیس انہیں تلاش کرے ۔
سومیشور نائک نے اخباری نمائندوں سے بات کرتے ہوئے کہا کہ بھارتیہ جنتا پارٹی کے نشان پر الیکشن جیتے ہوئے شیورام ہیبار کو اسمبلی میں راجیہ سبھا کے لئے پارٹی امیدوار کے حق میں ووٹ دینا چاہیے تھا ، لیکن انہوں نے اپنا ووٹ پارٹی امیدوار کے حق میں استعمال نہ کرتے ہوئے اپنے حلقے کے عوام سے دھوکا کیا ہے ۔
