بینگلورو ،19/ ستمبر (ایس او نیوز) وجریداہی مٹھ کے راجا شیکھرا نندا سوامی جی نے چِئیترا کنداپورا دھوکہ دہی معاملے میں کچھ چونکا دینے والے انکشافات کیے ہیں ۔
    
سوامی جی نے ایک کنڑا نیوز چینل سے بات چیت کے دوران کہا ہے کہ اس معاملے میں میرا نام گھسیٹے جانے کے بعد اب اس تعلق سے حقائق بیان کرنا میرے لئے ضروری ہو جاتا ہے ۔ ہندو لیڈر ستیہ جیت سورتکل نے فون کرکے مجھ سے کہا کہ میں نے اگر 1.5 کروڑ روپے گووندا بابو سے لیے ہیں تو میں واپس لوٹا دوں ۔ میں اس بات سے پریشان ہوگیا ۔ میں ستیہ جیت کو بتایا کہ میں تو صرف ایک مرتبہ کولّور میں گووندا بابو سے ملا ہوں ۔ تو ستیہ جیت نے فون کاٹ دیا ۔ میں نے یہ بات شرن پمپ ویل کو بتائی ۔ اس کے بعد ستیہ جیت نے مجھے فون کرکے بتایا کہ 1.5  کروڑ روپے کا معاملہ ابھینَو ہالاشری کا ہے ۔ 
    
یہ تمام تفصیلات میں نے چکرورتی سولیبیلے کو بتاتے ہوئے جب یہ کہا ابھینَو شری کا تعلق یووا بریگیڈ سے ہے تو سولیبیلے نے کہا کہ اس نے سی ٹی روی سے بات کی ہے ۔ اس کے بعد میں نے براہ راست چئیترا کنداپورا سے رابطہ کیا ۔ اس نے تمام  الزامات کو مسترد کر دیا ۔ اس طرح مجھے معلوم ہوا کہ چئیترا کنداپورا اور ہالاشری سوامی کے اچھے تعلقات ہیں ۔ پھر اس کے بعد مجھے گگن  کے بارے میں پتہ چلا تو اس معاملے کو بی جے پی کے اعلیٰ لیڈروں کے علم میں لایا گیا ۔  
    
وجریداہی سوامی جی نے کہا کہ میں نے یہ ساری بتائیں نرنجن کے ذریعے گووندا پجاری تک پہنچائیں تو دو ہفتے کے بعد اس نے مجھے بتایا کہ اس معاملے میں میرا نام شامل نہیں ہے ۔ گووندا بابو کے خاص ساتھی گنگولی کے واسو دیوا کے ذریعے مجھے پتہ چلا کہ اس میں 90%  سچائی ہے ۔ 
    
وجریداہی سوامی جی نے سولیبیلے کے تعلق سے سنسنی خیز انکشاف کرتے ہوئے کہا اسمبلی انتخابات ختم ہونے کے بعد غالباً اگست کے مہینے میں میں نے چکرورتی سولیبیلے سے گفتگو کی تو اس نے مسکراتے ہوئے مجھ سے پوچھا کہ کہیں اس کا نام تو اس معاملے سے جوڑا نہیں گیا ہے ؟ یہ خبر تو بہت دنوں سے گردش کر رہی ہے ۔ میں نے سی ٹی روی سے بھی بات کی ہے ۔ اور میرے کچھ بتانے سے پہلے ہی سولیبیلے کو تمام باتوں کا پورا علم تھا ۔