نئی دہلی، 24/مئی (ایس او نیوز/ایجنسی) وزیر اعظم نریندر مودی کے ہاتھوں 28 مئی کو نئے پارلیمنٹ ہاؤس کا افتتاح ہونا ہے، لیکن ترنمول کانگریس نے خود کو اس تقریب سے کنارہ کر لیا ہے۔ ترنمول کانگریس کا کوئی بھی رکن پارلیمنٹ یا لیڈر اس تقریب میں شامل نہیں ہوگا، یعنی پارٹی نے نئے پارلیمنٹ ہاؤس کے افتتاحی پروگرام کے بائیکاٹ کا فیصلہ کیا ہے۔

ترنمول کانگریس رکن پارلیمنٹ ڈیریک او برائن نے نئی پارلیمنٹ اور اس کی افتتاحی تقریب سے متعلق ایک ٹوئٹ کیا ہے جس میں وزیر اعظم نریندر مودی پر شدید حملہ کیا ہے۔ انھوں نے کہا ہے کہ وزیر اعظم کے لیے نئی پارلیمنٹ بلڈنگ کے افتتاح کا مطلب ہے ’میں، میرا، مجھے‘۔ ڈیریک نے ساتھ ہی ٹوئٹ میں لکھا ہے کہ ’’پارلیمنٹ صرف ایک بلڈنگ نہیں ہے بلکہ یہ پرانی روایات، اقدار، مثالوں اور اصولوں کے ساتھ ایک ادارہ ہے۔‘‘ انھوں نے پارلیمنٹ ہاؤس کو ہندوستانی جمہوریت کی بنیاد قرار دیا اور کہا کہ یہ باتیں پی ایم مودی کو سمجھ میں نہیں آتی ہیں۔

قابل ذکر ہے کہ وزیر اعظم نریندر مودی اربوں روپے کی لاگت سے تیار نئی پارلیمنٹ بلڈنگ کا افتتاح 28 مئی کو کرنے والے ہیں۔ 4 منزلہ اس عمارت میں 1200 اراکین پارلیمنٹ کو بیٹھنے کا انتظام موجود ہے۔ حالانکہ کانگریس نے کئی بار اس نئے پارلیمنٹ ہاؤس کی تعمیر پر ہی سوالیہ نشان اٹھایا ہے۔ ساتھ ہی کانگریس کو اس بات پر بھی اعتراض ہے کہ وزیر اعظم نئے پارلیمنٹ ہاؤس کا افتتاح کیوں کر رہے ہیں، یہ کام صدر جمہوریہ کے ہاتھوں ہونا چاہیے تھا۔