جنوبی فلپائن میں شدید زلزلہ، ایک خاتون کی موت
منیلا 3 دسمبر (ایس او نیوز): فلپائن کے شہر مڈاناؤ میں ہفتہ (2 دسمبر) کی رات کو آئے زلزلے کے جھٹکے میں ایک خاتون کی موت واقع ہوگئی۔ بتایا گیا ہے کہ ریختر پیمانے پر زلزلے کی شدت 7.4 ناپی گئی ہے۔
میڈیا رپورٹوں میں زلزلے کے جھٹکوں کے بعد سونامی کی وارننگ جاری کر دی گئی ہے۔ نیشنل سینٹر فار سیسمولوجی کے مطابق یہ زلزلہ رات 8 بجکر 7 منٹ پر آیا۔ اس کا مرکز زمین میں 50 کلومیٹر کی گہرائی میں تھا۔
رائٹرز کے مطابق فلپائن کے جنوب میں زلزلے سے کم از کم ایک خاتون اُس وقت ہلاک ہوگئی جب ٹیگم شہر کا کنبہ جان بچانے کے لیے گھر سے نکل رہا تھا کہ اچانک اُس پر دیوار گرپڑی۔ ڈیزاسٹر حکام کے مطابق انفرااسٹرکچر کو معمولی نقصان پہنچا ہے۔ زلزلے نے سوریگاو ڈیل سور اور ڈیواؤ اورینٹل صوبوں کے کچھ حصوں کو ہلا کر رکھ دیا، جس سے ملک اور جاپان میں ساحلی انخلا اور سونامی کا الرٹ جاری کیا گیا۔
رپورٹس کے مطابق اتوار کی صبح تک زلزلے سے منسلک سونامی کا خطرہ بڑی حد تک ٹل چکا تھا، اور گھروں سے نکلنے والے شہری واپس گھروں کو لوٹ رہے ہیں۔
خبر رساں ادارے رائٹرز کے مطابق، گزشتہ ماہ کے اوائل میں، جنوبی فلپائن میں 6.7 شدت کے زلزلے سے آٹھ افراد ہلاک ہو گئے تھے۔ 17 نومبر کو آنے والے زلزلے میں سارنگانی، جنوبی کوٹاباٹو اور داواؤ اوکسیڈینٹل کے صوبوں میں 13 افراد ہلاک اور 13 زخمی ہوئے تھے اور50 سے زائد مکانات اور عمارتوں کو نقصان پہنچا تھا۔
خیال رہے کہ عام طور پر ریکٹر اسکیل پر 7 یا اس سے زیادہ کی شدت کے زلزلے کو معمول سے زیادہ خطرناک سمجھا جاتا ہے۔ فلپائن بحرالکاہل کے علاقے کے 'رنگ آف فائر' میں آتا ہے جہاں زلزلے اکثر آتے رہتے ہیں۔ یو ایس جیولوجیکل سروے نے اس خطے کو دنیا کا سب سے زیادہ زلزلہ اور آتش فشاں فعال خطہ قرار دیا ہے۔
