بنگلور و،28/ فروری (ایس او  نیوز ) راجیہ سبھا کی چار سیٹوں کے لئے ودھان سودھا میں ہوئی پولنگ میں یشونت پور حلقہ کے بی جے پی رکن اسمبلی ایس ٹی سوم شیکھر کانگریس امیدوار کے حق میں کر اس ووٹنگ کرنے کی خبر جیسے ہی جنگل کی آگ کی طرح پھیلی ، جے ڈی ایس ور کرس نے سوم شیکھر کے خلاف اپنے غصہ کا اظہار کرتے ہوئے سوم شیکھر کا پتلہ نذر آتش کیا ۔

جے ڈی ایس اور بی جے پی ورکرس نے متحد ہو کر سوم شیکھر کے خلاف احتجاجی مظاہرہ کیا اور سوم شیکھر پر الزام لگایا کہ انہوں نے 25 کروڑ روپے کے عوض کانگریس کو اپنا ووٹ فروخت کیا ہے۔ جیسے ہی یہ خبر پھیلی کہ سوم شیکھر نے کانگریس کے حق میں کر اس ووٹنگ کی ہے تو دو اتحادی پارٹیوں کے کارکنوں نے جے ڈی ایس کی سٹی یونٹ کے صدر ایچ ایم رمیش گوڈا کی قیادت میں احتجاجی مظاہرہ کیا اور مظاہرین نے ایس ٹی سوم شیکھر پر اپنے غم و غصہ کا اظہار کیا جو بی جے پی کی ٹکٹ پر کامیاب ہوئے تھے اور کہا کہ انہوں نے اپنے ذاتی مفاد  کی خاطر پارٹی کو دھوکہ دیا ہے ۔

اس احتجاج کے دوران میڈیا سے بات کرتے ہوئے رمیش گوڈا نے کہا کہ ایس ٹی سیوم شیکھر کو اسمبلی رکنیت سے نا اہل قرار دیا جانا چاہئے ۔ انہوں نے سوم شیکھر  پر یہ سنجیدہ الزام لگایا کہ انہوں نے کراس ووٹ کرنے کانگریس سے 25 کروڑ روپے رشوت لی ہے۔ انہوں نے کہا کہ اگر سوم شیکھر کو اسمبلی اسپیکر نے نااہل قرار نہیں دیا تو ان کے خلاف قانونی کارروائی کی جائے گی۔ انہوں نے یہ بھی دھمکی دی کہ بنگلورو کے تمام اسمبلی حلقوں میں کل چہار شنبہ ہی سے احتجاج کیا جائے گا۔

دریں اثناء مشتعل کارکنوں نے ایس ٹی سوم شیکھر کا پتلہ نذر آتش کیا۔ اس طرح اپنے غم وغصہ کا اظہار کیا۔ پارٹی کو دھوکہ دینے کا الزام لگاتے ہوئے بی جے پی یوا مورچہ کے کارکنوں نے کینگیری میں سوم شیکھر کے دفتر کے روبرو احتجاجی مظاہرہ کیا اور سوم شیکھر کے خلاف نعرے  لگائے ۔ کارکنوں  نے شہر کے مختلف مقامات پر سوم شیکھر کی تصاویر پر انک پوت کران کے استعفیٰ کا مطالبہ کیا۔ بی جے پی ورکرس کے اس احتجاج کی وجہ سے  کینگیری رنگ روڈ پر تا دیر ٹرا فک جام رہی۔