کیپ ٹاﺅن 13/نومبر(ایس او نیوز/ایجنسی)  جنوبی افریقہ  نے غزہ میں جنگی جرائم پر اسرائیلی وزیراعظم کو گرفتار کرنے کا مطالبہ کیا ہے، میڈیا رپورٹ کے مطابق  جنوبی افریقہ کی وزیر خارجہ نالیدی پاندور نے   بین الااقوامی فوجداری عدالت سے مطالبہ کیا کہ  اسرائیلی وزیراعظم نیتن یاہو کے خلاف گرفتاری کا وارنٹِ  جاری کرے۔

 نالیدی پاندور نے کہا  کہ اسرائیل غزہ میں انسانیت سوز مظالم کا مرتکب ہو رہا ہے۔ خواتین اور بچوں کو بھی وحشیانہ بمباری کا نشانہ بنا رہا ہے۔انہوں نے کہا کہ  اسرائیل بین الااقوامی فوجداری عدالت کے دائرہ اختیار میں آنے والی 4 میں سے 3 خلاف ورزیوں یعنی جنگی جرائم، انسانیت کے خلاف جرائم اور قتل عام کا مرتکب ہوا ہے۔

نالیدی پاندور نے مطالبہ کیا کہ آئی سی سی کے پراسیکیوٹر اسرائیل کے خلاف غزہ میں جنگی جرائم کی تحقیقات کی رفتار کو بڑھائے اور اسرائیلی وزیرعظم نیتن یاہو کی گرفتاری کے لئے  وارنٹ جاری کرے۔انہوں نے  مزید کہا کہ غزہ میں معصوم شہریوں کی ہلاکتوں پر اسرائیلی وزیراعظم نیتن یاہو کو ان کی کابینہ کے کچھ ارکان سمیت فی الفور گرفتار کرنا چاہیے۔ یاد رہے کہ جنوبی افریقہ نے اسرائیل کے غزہ پر مسلسل بمباری کے خلاف احتجاج  درج کرتے ہوئے تل ابیب سے اپنے سفیر بھی واپس بلالیے تھے۔

بتاتے چلیں  کہ 7 اکتوبر سے غزہ پر جاری اسرائیلی بمباری میں شہید ہونے والے فلسطینیوں کی تعداد 12 ہزار کے قریب پہنچ چکی ہے  جن میں 4 ہزار 324   بچے اور 2 ہزار 823 خواتین شامل ہیں جب کہ حماس کی کارروائیوں میں مارے گئے اسرائیلیوں کی تعداد تقریباً 1,600 ہے۔