کرناٹک میں بڑھ رہے ہیں خودکشی کے معاملات؛ ساحلی کرناٹکا میں ایک ہی دن میں سامنے آئی خود کشی کی 6 وارداتیں
بھٹکل ۵ ڈسمبر (ایس او نیوز)ریاست کرناٹک بالخصوص ساحلی کرناٹکا میں خودکشی کے واقعات میں روزبروز ااضافہ دیکھا جارہا ہے جس کو لے کر عام شہری تشویش میں مبتلا ہیں، لیکن پیر کو ایک ہی دن الگ الگ علاقوں میں چھ لوگوں کے خودکشی کے واقعات سامنے آنے کے بعد عوام زور دے رہے ہیں کہ اس حد تک بڑھتی خودکشی کی واقعات پرغور کیا جائے اور اس کے تدارک کی فکر کی جائے۔
ضلع جنوبی کینرا کے پتور تعلقہ میں ایک ہی دن تین لوگوں نے خودکشی کی ہے۔ اطلاعات کے مطابق تعلقہ کے بڈگنور گرام میں پریتم گوڈا نامی شخص نے کنویں میں چھلانگ لگا کر خود کشی کر لی۔ پتہ چلا ہے پریتم گوڈا سولیا میں موجود پریوار کوآپریٹیو سوسائٹی میں منیجر کے عہدے پر فائز تھا۔ خودکشی کا دوسرا معاملہ پتور تعلقہ کے ماڈنّور گرام میں پیش آیا جہاں آریڈکا گرام پنچایت کے رکن شنکر ماڈنّور (48 سال) نے اپنے گھر میں پھانسی لگا کر خود کشی کر لی۔ معلوم ہوا ہے کہ شنکر نے زمین خریدنے کے لئے فائنانس سوسائٹیوں سے قرضہ لیا تھا اور یہ قرضہ ادا کرنے کی سہولت نہ ہونے کی وجہ سے اس نے خود کشی کر لی۔ شنکر کی بیوی ونیتا کی طرف سے موصولہ شکایت کے مطابق سمپیا پولیس اسٹیشن میں کیس درج کیا گیا ہے۔
پتور میں ہی خودکشی کا تیسرا معاملہ آریاپو گرام سے سامنے آیا جہاں پر قلی مزدوری کرنے والے ایک شخص نے اپنے ہی گھر میں پھندا لگا کر خود کشی کر لی۔ مہلوک کا نام پرکاش شیٹی (46 سال) بتایا گیا ہے ۔ جب گھر کے دیگر افراد باہر گئے ہوئے تھے تو پرکاش نے پھانسی کے ذریعے اپنی جان لی۔ جب گھر والے دو دن واپس لوٹے تو پرکاش کی سڑی گلی لاش پھانسی کے پھندے سے لٹکتی ہوئی پائی گئی۔ سمپیا پولیس اسٹیشن میں معاملہ درج کیا گیا ہے۔
دکشن کنڑا کے ہی الال سے موصولہ رپورٹ کے مطابق کمپل ہنومان نگر میں ایک شخص نے کنویں میں چھلانگ لگا کر خود کشی کر لی جس کی شناخت نوین (43 سال) کے طور پر کی گئی ہے۔ خود کشی کی وجوہات کے بارے میں کوئی تفصیل معلوم نہیں ہوئی ہے۔
ساحلی ضلع اُڈپی کے کنداپور تعلقہ کے بیجاڈی میں قرضے کے بوجھ سے پریشان ایک مچھلی کے تاجر نے خود کشی کرلی جس کی شناخت کوٹاتٹّو کے رہنے والے اودئے (47 سال) کے طور پر کی گئی ہے۔ اس سلسلے میں کنداپور پولیس اسٹیشن میں کیس درج کیا گیا ہے۔
ایک اور ساحلی ضلع اترکنڑا کے ہوناور تعلقہ منکی پولیس اسٹیشن حدود میں ایک خاتون نے پھانسی لگا کر خودکشی کرلی جس کی شناخت لکشمی ہنومنت گوڈا (48 سال) کے طور پر کی گئی ہے۔ پولیس کے پاس درج کروائی گئی شکایت کے مطابق لکشمی نے کسی معاملے پر ذہنی طور پر پریشان ہو کر پھانسی کے ذریعے اپنی جان دی ہے۔ اس ضمن میں منکی پولیس اسٹیشن میں کیس درج کیا گیا ہے۔
یاد رہے کہ ہفتہ عشرہ روز قبل یعنی 26 نومبرکو ریاست کرناٹک کے ہی ٹمکورمیں ایک ہی گھر کے پانچ لوگوں نے قرضہ کے بوجھ سے پریشان ہوکر خودکشی کی تھی جس میں تین معصوم بچے بھی شامل تھے۔
