سرسی 12 / فروری (ایس او نیوز) شہری حدود میں عمارتوں کی تعمیر کے لئے سٹی میونسپل کونسل کی طرف اجازت دینے کا جو اختیار پلاننگ آفیسر کو دیا گیا تھا وہ تکنیکی بنیادوں پر واپس لیا گیا ہے جس کی وجہ سے ایک طرف سرکاری خزانے کو نقصان ہو رہا ہے تو دوسری طرف مکانات اور دیگر عمارتیں تعمیر کرنے کے خواہشمند عوام کو بڑی پریشانی کا سامنا کرنا پڑ رہا ہے۔
    
بتایا جاتا ہے کہ نومبر 2023 میں شہری حدود میں 4 ہزار اسکوائر فٹ تک کی عمارتیں تعمیر کرنے کے لئے پلاننگ آفیسر کو تکنیکی رائے دینے اور جنوری 2024 میں تعمیر شروع کرنے کے لئے ابتدائی اجازت نامہ دینے کا اختیار مقامی شہری بلدی اداروں کو تفویض کیا گیا تھا۔ 
    
اب 5 فروری کو محکمہ ٹاون ڈیولپمنٹ کی انڈر سیکریٹری  لتا کے نے ایک حکم جاری کیا  ہے جس کی رو سے شہری بلدی اداروں سے تعمیرات کے لئے ابتدائی اجازت نامہ دینے کا اختیار تکنیکی بنیادوں پر واپس لے لیا گیا ہے ۔ کیونکہ سابقہ حکم میں 10 جنوری 2024 کی جگہ غلطی سے  10 جنوری 2021 درج ہوا ہے۔ 
    
عوام کا کہنا ہے کہ اب شہری بلدی اداروں میں عوام کو تعمیرات کے اجازت نامہ دینے سے انکار کیا جا رہا ہے ۔ روز نئے قوانین کی وجہ سے مکانات اور دیگر تعمیرات کرنے والے عوام کو پریشانیوں سے گزرنا پڑ رہا ہے۔  پلاننگ آفیسر کا اختیار ختم کیے جانے  کی وجہ سے سرسی شہری بلدی علاقے میں ماہانہ 75 لاکھ روپے ٹیکس کا نقصان ہو رہا ہے۔