بنگلورو، 13/ اپریل (ایس او نیوز /ایجنسی) بنگلورو کے رامیشورم کیفے میں ہوئے دھماکہ معاملے میں این آئی اے نے دو مبینہ ماسٹر مائنڈ کو کولکتہ سے گرفتار کرلیا ہے، ذرائع سے ملی اطلاع کے مطابق دونوں ملزمین کو ٹرانزٹ ریمانڈ پر بنگلور لایا گیا ہے، جہاں طبی جانچ کے بعد بنگلور میں واقع این آئی اے عدالت میں پیش کیا جائے گا۔این آئی اے کے مطابق مصّور حُسین شازب نامی ملزم نے کیفے میں دھماکہ خیز مادہ رکھا تھا اور عبدالمتین طحہٰ دھماکہ کا منصوبہ بنانے اور اسے انجام دینے کا اہم سازشی تھا۔ این آئی اے نے گزشتہ مہینے ان دونوں ملزمین کی گرفتاری میں مددگار ثابت ہونے والی اطلاع دینے والے کو 10-10 لاکھ روپے انعام دینے کا اعلان کیا تھا۔ میڈیا رپورٹوں کے مطابق یہ دونوں کولکاتہ میں نقلی ناموں کے ساتھ ایک ہوٹل میں مقیم تھے۔
رپورٹوں کے مطابق کولکاتا کی ایک عدالت نے رامیشورم کیفے دھماکہ معاملے میں گرفتار دونوں ملزمین مصور اور عبدالمتین کو جمعہ کے روز تین دن کی ٹرانزٹ ریمانڈ پر کرناٹک کی راجدھانی بینگلور لے جانے کی اجازت دی تھی۔ گرفتار مصّور اور عبدالمتین دونوں کا تعلق شموگہ ضلع کے ترتہلّی سے ہے۔
این آئی اے نے ان دونوں کی تلاش میں کرناٹک، تمل ناڈو اور یوپی میں 18 مقامات پر چھاپے مارے تھے، مگر ان دونوں کا پتہ نہیں چلا تھا، اس کے ساتھ ہی جانچ ایجنسی نے بی جے پی کارکن سائی پرساد کو بھی دھماکہ کیس میں اپنی تحویل میں لیا ہے۔ این آئی اے کا کہنا ہے کہ سائی کے کیفے دھماکے کے ملزمین سے تعلقات ہیں۔این آئی اے کے مطابق مُصّور اور عبدالمتین دونوں داعش کے ماڈیول کا حصہ ہیں۔