بھٹکل 11/ اپریل (ایس او نیوز) کرناٹک نے سکینڈ پی یو سی میں 81.2 فیصد کامیابی کے ساتھ اب تک کا سب سے زیادہ پاس فیصد ریکارڈ قائم کیا ہے، جس کے تحت ریاست میں6.8 لاکھ طلباء کامیاب ہوگئے ہیں۔ اس کے ساتھ ہی پچھلے سال کے مقابلے میں امسال کامیابی کی شرح میں 6.5 فیصد کا  ریکارڈ اضافہ درج  ہوا ہے۔

سائنس اسٹریم میں، ودیانکیتھن ایس سی پی یو کالج، ہبلی-دھارواڑ کی اے ودیالکشمی نے 600 میں 598 نمبرات حاصل کرکے پوری ریاست میں ٹاپ کیا ہے۔شعبہ  کامرس میں، ودیاندھی انڈیپنڈنٹ پی یو کالج، ٹمکور کی جنانوی ایم نے 597 نمبرات حاصل کرکے ٹاپ پرہیں جبکہ آرٹس  میں تین اسٹوڈینٹس، این ایم کے آر وی پی یو کالج، جیانگر، بنگلور کی میدھا ڈی؛ ایس ایس پی یو کالج، وجئے پورہ کے ویدانت جنانوبا نوی؛ اور انڈو انڈیپنڈنٹ پی یو کالج، بلاری کی کویتا بی وی نے 596 نمبرات حاصل کرکے ریاست بھر میں ٹاپ پوزیشن پانے میں کامیاب ہوئے ہیں۔

ساحلی کرناٹک کے اضلاع پھر ایک بار تعلیمی میدان میں اپنی برتری برقرار رکھنے میں کامیاب رہے ہیں۔ ایک طرف  جنوبی کینرا (دکشن کنڑا) نے 97.37 فیصد کامیابی کی شرح کے ساتھ  پھر ایک بار  ریاست بھر میں اول مقام حاصل کیا ہے تو  اُڈپی 96.80 فیصد کے ساتھ دوسرے نمبر،  وجے پورا 94.89 فیصد کے ساتھ تیسری پوزیشن پر اور ساحلی ضلع اُترکنڑا  92.51 فیصد اوسط کے ساتھ چوتھا مقام پانے میں کامیاب  ہوا ہے۔   گدگ اس بار سب سے آخری پوزیشن پر ہے۔ اس کے ساتھ ہی  دو سرکاری اور چھ امدادی کالجوں سمیت ریاست کی 35 کالجس ایسی بھی ہیں جہاں کو کوئی بھی اسٹوڈینٹ کامیاب نہیں ہوسکا ہے، ان میں چھ کالجس بنگلورو کے ہیں۔

یاد رہے پی یو سی اول (فرسٹٰ) کے امتحانات یکم مارچ سے 22 مارچ تک منعقد  ہوئے تھے۔ 

دکشن کنڑا کو پہلا مقام: دکشن کنڑا نے لگاتار پانچویں سال کرناٹک میں II PU کے نتائج میں ٹاپ پوزیشن حاصل کر کے ایک بار پھر اپنی تعلیمی فضیلت کا مظاہرہ کیا ہے۔ ضلع نے 97.37  فیصد کا متاثر کن پاس فیصد حاصل کیا ہے، حالانکہ پچھلے سال اس ضلع نے 95.3 فیصد کارکردگی کے ساتھ بھی ریاست میں ٹاپ کیا تھا۔ اس ضلع نے آرٹس، کامرس اور سائنس کے شعبوں میں بھی کئی اعلیٰ درجے حاصل کیے ہیں، جس سے تعلیمی فضیلت کے مرکز کے طور پر اس کی ساکھ مزید مستحکم ہوگئی ہے۔بتاتے چلیں کہ گذشتہ پانچ سالوں کی تعلیمی کارکردگی پر نظر دوڑائیں  تو   ضلع دکشن کنڑا نے   پانچویں مرتبہ لگاتار  اول پوزیشن حاصل کی ہے۔