نائجیریا میں پاور گریڈ تباہ، ملک بھر میں اندھیرا چھا گیا
لاگوس، 15/ستمبر (ایس او نیوز/ایجنسی) نائجیریا میں اچانک پاور گریڈ تباہ ہونے کے سبب ملک بھر میں بلیک آؤٹ ہو گیا ہے۔ اچانک بجلی کی بندش کے سبب نہ صرف نائجیریا کی راجدھانی ابوجا بلکہ 34 ریاستیں بھی بری طرح متاثر ہوئی ہیں۔ گریڈ متعدد مرتبہ گر چکا ہے لیکن اب تک یہ واضح نہیں کہ بجلی کب تک بحال ہوگی۔ نائجیریا کی انوگون الیکٹریسٹی ڈسٹری بیوشن کمپنی، جو جنوبی نائجیریا کو بجلی فراہم کرتی ہے، نے بیان جاری کیا ہے جس میں کہا ہے کہ ’’بجلی نہ ہونے کی وجہ سے مکمل سسٹم تباہ ہو گیا ہے۔‘‘ کمپنی کے ترجمان ایمیکا ایزی نے کہا کہ اس تبدیلی کی وجہ سے ہم اپنے صارفین کو خدمات نہیں فراہم کر سکتے۔
اس حوالے سے نائجیریا کی ٹرانزمیشن کمپنی کے ڈیٹا کے مطابق آج صبح پاور جنریشن زیرو تک پہنچ گیا تھا جو ۱۰؍ بجکر ۳۰؍ منٹ پر ۲۷۳؍ میگا بائٹس ( ایم ڈبلیو) تک بڑھا تھا جو روزانہ کےاوسطاً ۴؍ ہزار ۱۰۰؍ میگا بائٹس سے نیچے تھا۔ شمالی نائجیریا کو بجلی فراہم کرنے والی کندونا الیکٹریسٹی ڈسٹری بیوشن کمپنی نے اپنے بیان میں کہا ہے کہ جیسے ہی نیشنل گریڈ کا پاور بحال ہو گا بجلی کی منتقلی بحال کر دی جائے گی۔ گریڈ پاور تباہ ہونے نے گھرانوں اور بزنس کے کاموں کو ایندھن اور پیٹرول استعمال کرنے پر مجبور کر دیا ہے۔ملک میں حکومت کی جانب سے سبسیڈی ختم کرنے کی وجہ سے ملک بھر میں پیٹرول اور ایندھن کی قیمتیں دگنا ہو گئی ہیں۔ خیال رہے کہ ۲۰۲۲ء میں بھی نائجیریا میں گریڈ ۴؍ مرتبہ تباہ ہو گیا ہے جسے حکومت نے تکنیکی خرابی قرار دیا تھا۔ نائجیریا کے وزیراعظم بولا تنوبو نے ریاستی حکومتوں کو اپنی اپنی ریاستوں میں پاور پلانٹ قائم کرنے کی اجازت دے کر ملک میں بجلی کی منتقلی بہتر کرنے کا وعدہ کیا ہے۔