منیلا 7/ ڈسمبر (ایس او نیوز) سینٹرل فلپائن میں ایک مسافر برداربس کھائی میں جا گرنے کی وجہ سے سترہ افراد ہلاک ہوگئے جبکہ گیارہ دیگر زخمی ہوگئے۔ زخمیوں میں سات کی حالت نازک بتائی گئی ہے۔ رائٹرس کی رپورٹ کے مطابق بس فلپائن کے ایک صوبے سے دوسرے صوبے جارہی تھی جس پر 30 سے زائد مسافرسوارتھے۔ حادثہ منگل کی شام کو پیش آیا۔
بتایا گیا ہے کہ جس جگہ پر یہ واردات پیش آئی اسے مقامی لوگ موت کا کنواں قرار دیتے ہیں۔
رپورٹ کے مطابق بس جب ایک موڑ کی طرف مُڑ رہی تھی تو بے قابو ہوکر گہری کھائی میں گرگئی۔ رائٹرس کی رپورٹ کے مطابق عینی شاہدین نے بتایا کہ بس کا بریک فیل ہوجانے سے یہ المناک حادثہ پیش آیا البتہ پولیس کا کہنا ہے کہ ابھی تفتیش ابتدائی مراحل میں ہے اورمکمل تفتیش کے بعد ہی حادثے کی وجہ کے بارے میں کچھ کہا جا سکتا ہے۔
پولیس کے حوالے سے رپورٹ میں بتایا گیا ہے کہ ہلاک اور زخمی ہونے والوں میں خواتین اور بچے بھی شامل ہیں۔