بنگلورو، 26؍نومبر (ایس او  نیوز)کرناٹک میں اگلے اسمبلی انتخابات کے لئے کانگریس پارٹی ٹکٹ کے لئے درخواست دینے والے دعویداروں کو کرناٹک پردیش کانگریس کمیٹی کے صدر ڈی کے شیو کمار نے کہا ہے کہ پارٹی کی طرف سے انتخابات میں ٹکٹ کسے دیا جائے گا، اس کا فیصلہ اعلیٰ کمان کی جانب سے کیا جائے گا اور کسی دعویدار کو ٹکٹ نہ دیا تو اسے دلبرداشتہ ہونے کی ضرورت نہیں، بلکہ ان کی ذمہ داری ہو گی کہ وہ اگلے اسمبلی انتخابات میں کانگریس پارٹی کو کم از کم 130سیٹوں پرکامیاب بنانے کے لئے کام کریں۔

انہوں نے کہا کہ کرناٹک میں بی جے پی حکومت کی بدنظمی سے عوام کو واقف کروانے کے لئے پارٹی کارکنوں کو ہر ایک بوتھ کی سطح پر کام کرنا چاہئے۔ انہوں نے کہا کہ ریاست کے اقتدار پر اراکین اسمبلی کی خریداری کرکے قابض ہونے والی بی جے پی کو اس بار عوام ضرور سبق سکھائیں گے۔ انہوں نے کہا کہ شمالی کینرا ضلع کے عوام کافی عرصہ سے بی جے پی کا ساتھ دیتے رہے ہیں،لیکن اس ضلع کی ترقی کے لئے بی جے پی نے کوئی منصوبہ نہیں بنایا، اس ضلع کے عوام کے معیار زندگی کو بلند کرنے کیلئے کانگریس حکومت کام کرے گی۔انہوں نے کہا کہ کرناٹک کے تعلیم یافتہ نوجوانوں کو روزگار میسر نہیں ہے، اس لئے وہ لوگ دوسری ریاستوں کا رخ کرنے کے لئے مجبور ہیں، حکومت کو ان نوجوانوں کی بے روزگاری سے کچھ سروکار نہیں، وہ صرف سماج میں نفرت پھیلانے میں لگی ہوئی ہے۔