اڈپی میں پیش آیا ایک اور آن لائن فراڈ کا معاملہ - خاتون نے گنوائے 85 ہزار روپے
اڈپی ،8/ جولائی (ایس او نیوز) اڈپی کے شیولّی گاوں میں پیش آئے آن لائن فراڈ کے تازہ معاملے میں ایک خاتون کے اکاونٹ سے 85 ہزار روپے اڑا لیے گئے ۔
شہر کے ایک اسپتال میں ملازمت کر رہی متاثرہ خاتون کی طرف سے منی پال پولیس کے پاس درج کی گئی شکایت کے مطابق ایک اجنبی شخص نے ڈاکٹر شرما جی کے نام سے اسے فون کرکے بتایا کہ وہ اس خاتون کے والد کا دوست ہے اور اس کے والد سے قرض لیے ہوئے پانچ ہزار روپے اس پر واجب الادا ہیں جسے وہ اس کے اکاونٹ میں جمع کر رہا ہے ۔
تھوڑی ہی دیر بعد اسے خاتون کو ایک میسیج آیا کہ اس کے کھاتے میں پچاس ہزار روپے جمع ہوئے ہیں ۔ تب اس خاتون نے اپنے کھاتے میں جمع شدہ رقم کی اصلیت کے بارے میں تصدیق کیے بغیر ہی اس شخص کو فون کرکے پوچھا کہ یہ اضافی 45 ہزار روپے کیسے آ گئے ۔ اس پر اس شخص نے کہا کہ یہ غلطی سے ہوا ہے ۔ اس لئے اس رقم کو فون پے کے ذریعے واپس بھیج دے ۔
اس اجنبی شخص ڈاکٹر شرماجی کی ہدایت پر عمل کرتے ہوئے گوگل پے اور فون پے کے ذریعے اس نے 45 ہزار روپے اس شخص کے اکاونٹ میں ٹرنسفر کر دئے ۔ پھر تھوڑی ہی دیر میں اسے میسیج ملا کہ اس کے کھاتے سے مزید دو مرتبہ 20 ہزار روپے اس شخص کے کھاتے میں ٹرانسفر ہوگئے ہیں ۔ پھر ایک اور میسیج آیا کہ اس کے اکاونٹ میں 16 ہزار روپے جمع کیے گئے ہیں ۔
جب اس خاتون نے کھاتہ چیک کیا تو پتہ چلا کہ اس کے کھاتے میں کوئی رقم جمع نہیں ہوئی بلکہ فراڈ کے ذریعہ اس کے کھاتے سے 85 روپے کی رقم اڑائی گئی ہے ۔