بیدر۔۳ دسمبر(ایس او نیوز/ایم اے حکیم) الامین اردوگرلزہا ئی اسکول بیدر اور کلیان کرناٹک اردو جرنلسٹس اسوسی ایشن بیدر کی جانب سے علاقہ کلیان کرناٹک کے 371(J)کے جہدکار، اردو شخصیت، معروف صحافی، محقق اور مؤرخ ڈاکٹر ماجد داغی ؔ کوگذشتہ روز شالپوشی اور گلپوشی کے ذریعہ تہنیت پیش کی گئی۔

اس موقع پر اسکول کی طالبات اور معلمات سے خطاب کرتے ہوئے موصوف نے کہا کہ زبان کا کوئی مذہب نہیں ہوتا۔ زبانیں اظہار خیال کاذریعہ ہوتی ہیں۔ دنیا کی سب سے کم عمر زبان اردو ہے۔ بین الاقوامی مستنداداروں کاکہنا ہے کہ  انتہائی کم عمری کے باوجود اردو زبان دنیا کی تیسری بولی اور سمجھی جانے والی زبان ہے۔ اگر اس کی تیزرفتاری کا یہی عالم رہاتو دیکھتے ہی دیکھتے یہ دنیا کی پہلی یاپھردوسری تیز رفتار زبان بن جائے گی۔ سیاسی طورپر لوگ بھلے ہی کچھ کہتے ہوں، لیکن اردو زبان آگے بڑھ رہی ہے۔ موصوف نے میرعثمان علی بادشاہ کے والد محترم میر محبو ب علی شاہ کی تاریخی خدما ت کا ذکر کرتے ہوئے کہاکہ سب سے پہلے دکن میں میرمحبو ب علی خان صاحب (بادشاہ ِ وقت) نے حیدرآباد میں اردو کو سرکاری زبان بنانے کااعلان کیا۔ جبکہ یہ سلسلہ آگے بڑھاتو ساتویں نظام میر عثمان علی خان صاحب نے ”عثمانیہ یونیورسٹی“ قائم کی جس کاذریعہ تعلیم اردو قرار دیاگیا۔اسی عثمانیہ یونیورسٹی میں اردو ادب کے علاوہ طب، انجینئرنگ اورٹیکنالوجی اردوزبان میں پڑھائی گئی۔ آج بھی اعلیٰ تعلیم اردوزبان میں حاصل کرنے کانظم اگر چاہیں تو ہوسکتاہے۔ ڈاکٹر ماجد داغی ؔ نے کہاکہ حصول ِ تعلیم محنت کامتقاضی ہے۔ اردو زبان کو نئے راستوں سے فروغ دینے کابھرپورموقع ہندوستان میں موجودہے۔ جناب داغی نے طالبات اور معلمات کے ذریعے پوچھے گئے سوالات کے جوابات بھی دئے۔ 

سینئر صحافی جناب محمد شجاع الدین نے اپنے خطاب میں کہاکہ جو طلبہ مادری زبان میں تعلیم حاصل کرتے ہیں وہ ترقی کرتے ہیں۔ آج لڑکیوں کااردوزبان میں تعلیم حاصل کرنا بیحدضروری ہے۔ موصوف نے اردو اسکول میں پڑھانے والے معلم /معلمات سے اپیل کی کہ وہ اپنے بچوں کو انگریزی میڈیم سے تعلیم دلارہے ہیں۔ کہیں ایسا نہ ہوکہ اردوزبان ہی ختم ہوجائے لہٰذا اپنے بچوں کوانگریزی کے ساتھ ساتھ اردو بھی پڑھائیں۔ انھوں نے الامین کاشکریہ اداکیااور ساتھ ہی صحافی محمدیوسف رحیم بیدری کی کاوشوں کو بھی سراہا۔ تقریب کی صدارت کرتے ہوئے معروف شاعروادیب اور صحافی جناب محمدیوسف رحیم بیدری نے کہاکہ جو طالبات دہم جماعت کے بعد اپناتعلیمی سفر اردو زبان میں جاری رکھنا چاہتی ہوں ان کے لئے مولانا آزادنیشنل اردو یونیورسٹی حیدرآباد سے پالی ٹیکنک کالج، بی ایڈ اور دیگر میدانوں میں اردو سے تعلیم حاصل کرنے کامواقع میسر ہیں۔ 

تقریب کاآغاز عفیفہ عالیہ (دہم جماعت) کی طالبہ کی قرأت کلام پاک سے ہوا۔عفیفہ صدیقہ (ہشتم جماعت) نے نعت شریف پیش کرکے سماں باندھ دِیا۔ دہم کی طالبہ سمیرانجم  نے اقبال اشہر کی نظم ”اردو ہے میرانام“ پیش کیا۔ تینوں طالبات کو محمدیوسف رحیم بیدری کی کتابیں تحفہ میں پیش کی گئیں۔ صدر معلمہ محترمہ عفت آراء صاحبہ نے اظہار تشکرکیا۔ تقریب میں صدرمعلمہ کے علاوہ معاون معلمات عابدہ بیگم، آمنہ تبسم،ام رومان، شہناز پروین، شافعہ فرحین، زیبا تہنیت اور تحسین بیگم وغیرہ بھی موجود تھیں۔