مکہ مکرمہ، 8/اگست(ایس او نیوز/ایجنسی) سعودی وزارت حج و عمرہ نے موسم گرما میں عمرہ کرنے والے زائرین کیلئے نئی ہدایات جاری کردی ہیں۔

سبق ویب سائٹ کے مطابق وزارت حج و عمرہ نے بیان میں زائرین سے کہا ہے کہ سعودی قوانین کی خلاف ورزی سے بچنے کیلئے عمرہ زائرین مسجد الحرام آمد سے قبل عمرہ پرمٹ ضرور حاصل کرلیں۔

سعودی وزارت حج و عمرہ کا کہنا ہے کہ عمرے کیلئے مسجد الحرام پہنچنے سے قبل پرمٹ کا اجرا ضروری ہے، ایسا نہ کرنا عمرہ قوانین کی خلاف ورزی ہو گا۔

وزارت کا کہنا ہے کہ زائرین نسک اور توکلنا ایپ پر عمرہ پرمٹ جاری کرا سکتے ہیں جبکہ سعودی وزارت حج و عمرہ نے موسم گرما میں عمرے کیلئے تین ہدایات جاری کی ہیں۔

سعودی وزارت نے جاری کردہ ہدایات میں کہا کہ موسم گرما میں عمرہ کرتے وقت معالج سے مشاورت کی جائے، موسم گرما میں عمرے کیلئے مناسب وقت کا انتخاب ضروری ہے۔

سعودی وزارت نے کہا کہ عمرہ کرنے کیلئے ایسے اوقات کا انتخاب کیا جائے جب درجہ حرارت معتدل ہو، مسجد الحرام پہنچنے کے بعد اور عمرہ شروع کرنے سے قبل آرام کا وقفہ لیا جائے۔