میسور: 25؍ مئی (ایس اؤ نیوز )امسال فروری میں وزیراعلیٰ سدرامیا کے خلاف اشتعال انگیز بیان بازی کئے جانے کےالزام میں ریاست کے سابق وزیر سی این اشوتھ نارائن کے خلاف پولس تھانے میں ایف آئی آر درج کرلی گئی ہے۔
کرناٹک پردیش کانگریس کمیٹی (کے پی سی سی ) کے ترجمان ایم لکشمن کی قیادت میں کانگریس کا ایک وفد میسورو کے دیوراج پولس تھانہ پہنچ کر نئے سرے سے شکایت درج کی۔15فروری کومنڈیا ضلع کے ساتنور دیہات میں عوام سے خطاب کرتےہوئے سابق وزیر اشوتھ نارائن نے ’’جس طرح اُری گوڈا اور ننجے گوڈا نے ٹیپو سلطان کو قتل کیاتھا‘‘کہتے ہوئے اسی لہجہ میں سدرامیا کے خلاف اشتعال انگیز بیان دیاتھا۔ اسی اشتعال انگیز بیان کو لےکراسی وقت یعنی 17فروری کو دیوراج پولس تھانے میں شکایت درج کرائی گئی تھی لیکن اس سلسلےمیں کوئی کارروائی نہیں ہوئی تھی۔
ایک ایسی ہی کوشش اس وقت بھی ہوئی تھی جب سدرامیا کورگ ضلع میں بارش کے نقصانات کا جائزہ لینےپہنچے تھے ۔ اور اس تعلق سے بھی متعلقہ ضلع میں شکایت دی گئی تھی۔ کانگریس وفد میں ڈسٹرکٹ کمیٹی کے صدر بی جے وجئے کمار سمیت دیگر عہدیداران شامل تھے۔