کنداپور : الیکٹرانکس شو روم میں بھڑکی بھیانک آگ سے کروڑوں روپے کا نقصان
کنداپور، 10 / جون (ایس او نیوز) کنداپور تعلقہ کے تراسی میں نیشنل ہائی وے 66 پر واقع امبا ٹی وی اینڈ ہوم اپلائنسس نامی شو روم میں کل شام کو اچانک آگ بھڑکنے سے زبردست نقصان ہوا ہے جس کا تخمینہ 1.3 کروڑ روپے لگایا گیا ہے ۔
سمجھا جاتا ہے کہ الیکٹرک شارٹ سرکیوٹ کی وجہ سے یہ آگ لگی ہوگی ۔ اس آگ پر قابو پانے کے لئے بیندور، کنداپور اور اڈپی سے موقع پر پہنچنے والے فائر بریگیڈ کے عملے کو صبح 3 بجے تک لگاتار مشقت کرنی پڑی ۔ جس میں مقامی رضاکاروں اور پولیس کے عملے نے بھرپور تعاون کیا ۔
چونکہ کل اتوار کا دن تھا اس لئے چہل پہل کم تھی اس وجہ سے آگ لگنے کا پتہ اس وقت چلا جب کہ شو روم کا بڑا حصہ آگ کی لپیٹ میں آ چکا تھا ۔ اس آگ کی وجہ سے دکان میں بھرا ہوا تمام قیمتی ساز و سامان تقریباً پوری طرح جل کر خاکستر ہو گیا ہے ۔
گنگولی پولیس نے موقع پر پہنچ کر معائنہ کیا ۔ مزید تحقیقات جاری ہے ۔