مینگلور کے قریب کاسرگوڈ میں تین بچوں کو جان سے مارنے کے بعد ماں باپ نے کر لی خودکشی
مینگلور25/مئی(ایس او نیوز) پڑوسی ریاست کیرالہ کے سرحدی ضلع کاسرگوڈ کے کانور چیرپولا سے ملی ایک المناک خبر کے مطابق اپنے تین بچوں کو ہلاک کرنے کے بعد ماں اور باپ نے بھی خود کشی کر لی ہے ۔
مہلوک خاندان کی شناخت شاجی (41 سال)، اس کی دوسری بیوی سریجا (38 سال)، بیٹی سروجا (10 سال) بیٹی سُرابھی (8 سال) اور بیٹا سوجین (12 سال) کے طور پر کی گئی ہے ۔ جائے واردات پر خود کشی کرنے والے جوڑے کی طرف سے لکھا گیا ایک ڈیتھ نوٹ ملا ہے ۔
پولیس کو شبہ ہے کہ اپنے تین بچوں کو پھانسی دے کر ہلاک کرنے کے بعد جوڑے نے خود بھی پھندا لگا کر خود کشی کر لی ہوگی۔ تینوں بچوں کی لاشیں گھر کی سیڑھیوں کے پاس لٹکتی پائی گئیں جبکہ قریب ہی اسی رسی سے ماں باپ کی لاشیں بھی لٹک رہی تھیں۔
اس انتہائی اقدام کے تعلق سے وجوہات ابھی سامنے نہیں آئے ہیں۔ پولیس نے کیس درج کرتے ہوئے لاشیں پوسٹ مارٹم کے لئے روانہ کردیں۔ مزید تحقیقات جاری ہے ۔
