بھٹکل:25؍ جنوری(ایس اؤ نیوز )اگلے انتخابات میں ہرحال میں جیت حاصل کرنے کا مقصد لےکر بےشمار منصوبہ جات اور وعدوں کو لے کر آگے بڑھ رہی کانگریس پارٹی نے کرناٹک کے ساحلی اضلاع  کے لئے  خصوصی   منشور کا اعلان کیا ہے۔

کانگریس نے منگلورو میں ساحلی  کرناٹکا کےمنشور کا اعلان کرتےہوئے کہاہے کہ ساحلی ترقی بورڈ کی تشکیل کرتےہوئے سالانہ 2500کروڑروپئے کی امداد دی جائےگی۔ اس کے علاوہ ہر ایک ماہی گیر کو 10لاکھ روپیوں کا انشورنس دیاجائےگا۔ آئندہ جب کانگریس حکومت بنائے گی تو ساحلی علاقے کی ہمہ جہت ترقی کے لئے 10نکاتی 10عزموں کا منشور تشکیل دیاجائےگا۔ ساحلی علاقےمیں روزگار کے مواقع، سرمایہ داری ، سیاحت اور ساحلی فرقہ وارانہ ہم آہنگی میں فروغ کےلئے بورڈ کی تشکیل دی جائے گی اور بورڈکو سالانہ 2500کروڑ روپئے دئیے جائیں گے۔ ایک لاکھ روزگار فراہم کرنےکےلئے منگلورو کو آئی ٹی ہب بنایاجائےگا۔ سپاری کولاحق ہونے والی زرد پتہ بیماری اور دیگر بیماریوں کے مطالعہ کےلئے اور سپاری مارکیٹ کو مستحکم کرنے کےلئے 50کروڑروپئے استعمال کئےجائیں گے۔ ہر ایک گرام پنچایت کو متعینہ امداد اور سوامی وویکانند فرقہ وارانہ اور سماجی ہم آہنگی کمیٹی کو تشکیل دئیے جانےکی بات منشور میں کہی گئی ہے۔

ماہی گیروں کو سہولت: ہر  ماہی گیر کو 10لاکھ روپیوں کی سہولت فراہم کی جائےگی۔ ماہی گیر خواتین کوبغیر سود والا  1لاکھ روپیوں کا قرضہ دیا جائےگا۔ سہولیات سے آراستہ ماہی گیر بوٹ خریدنے کےلئے 25لاکھ روپئے تک سبسڈی، ڈیزل سبسڈی ، فی لیٹر 10.71 روپئے سےاضافہ کرتےہوئے  25روپئے کی سبسڈی ، فی الحال دستیاب 300لیٹر ڈیزل میں اضافہ کرتےہوئے 500لیٹر دئیے جانے کی بات منشور میں کہی گئی ہے۔