کاروار: کرناٹکا میں بی جے پی کے ساتھ ہوسکتی ہے کانگریس کی بھاری ٹکر - حیدرآباد کے ادارے کی سروے رپورٹ
کاروار،22 / جنوری (ایس او نیوز) ریاست میں جلد ہی منعقد ہونے والے اسمبلی الیکشن کے پس منظر میں حیدر آباد ایس اے ایس گروپ نے کرناٹکا کی آئی ایس ایس ٹیم کے ساتھ مل کر 20 نومبر 2022 سے 15جنوری 2023 تک جو سروے کیا ہے اس کی رپورٹ بتاتی ہے کہ اس مرتبہ بی جے پی کی کانگریس کے ساتھ سخت ٹکر ہوگی اور قطعی نتائج میں اگر اسے سیٹوں پر ذرا بڑھوتری مل بھی جائے تو کانگریس اس سے کسی طرح کم ثابت نہیں ہوگی۔
سال 2018 میں ساحلی علاقے کی جملہ 21 اسمبلی سیٹوں میں سے بی جے پی نے 18 سیٹوں پر قبضہ جمایا تھا اور کانگریس کے حصے میں صرف 3 نشستیں آئی تھیں ۔ سروے رپورٹ کے مطابق اس مرتبہ بی جے پی کو اس علاقے میں 12 سے 15 سیٹوں پر محدود ہونا پڑے گا جبکہ کانگریس 7 تا 8 سیٹیں جیتنے میں کامیاب ہو سکتی ہے۔
اسی طرح سروے رپورٹ اشارہ کر رہی ہے کہ امسال کانگریس ریاستی اسمبلی میں 108 سے 114 تک سیٹیں بھیجنے میں کامیاب ہونے کے امکانات ہیں ۔ جبکہ بی جے پی 65 سے 75 اور جے ڈی ایس 24 سے 34 سیٹیں اپنے کھاتے میں لے سکتی ہے ۔ سروے رپورٹ بتا رہی ہے کہ اس مرتبہ کانگریس پارٹی اقلیتوں اور پسماندہ طبقات کے ووٹوں کا بڑا حصہ حاصل کرنے میں کامیاب ہوگی۔
