بینگلورو 14/نومبر (ایس او نیوز) بنگلور الیکٹری سٹی سپلائی کمپنی (بیسکام)  نے منگل کو کرناٹک کے سابق وزیر اعلیٰ ایچ ڈی کمار سوامی کے خلاف  بجلی چوری کا مقدمہ درج کیا جب کانگریس نے ان پر دیوالی کے موقع پر اپنی رہائش گاہ پر غیر قانونی طور پر بجلی  چوری کا الزام عائد کرتے ہوئے  سوشیل میڈیا پر وڈیو بھی شئیر کردی۔

سوشیل میڈیا  کے بعد کنڑا میڈیا میں معاملہ اُچھلتے  ہی بیسکام کے ویجیلنس ونگ نے   کمارا  سوامی کے خلاف  بیسکام  ویجیلنس پولیس اسٹیشن میں معاملہ  درج کرلیا۔ پتہ چلا ہے کہ  ان پر انڈین الیکٹری سٹی ایکٹ (بجلی کی چوری) کی دفعہ 135 کے تحت مقدمہ درج کیا گیا ہے۔

یاد رہے کہ معاملہ اُس وقت گرمایا جب حکمراں کانگریس نے کمارسوامی کی رہائش گاہ کا ایک ویڈیو سوشل میڈیا پلیٹ فارم X (ٹویٹر ) پر ایک بیان کے ساتھ پوسٹ کیا، جس میں جے ڈی (ایس) لیڈر اور سابق وزیر اعظم ایچ ڈی دیوے گوڑا کے بیٹے پر تنقید کی گئی تھی۔

سوشل میڈیا پلیٹ فارم X  پر کانگریس نے ٹویٹ کیا کہ "دنیا کے واحد ایماندار شخص ایچ ڈی کمار سوامی کی جے پی نگر رہائش گاہ کو براہ راست بجلی کے کھمبے سے غیر قانونی طور پر بجلی کے کنکشن کے ساتھ آرائشی لائٹس سے روشن کیا گیا  ہے۔ یہ ایک المیہ ہے کہ ایسی غربت نے ایک سابق وزیر اعلیٰ کو بجلی چوری کرنے پر آمادہ کیا ۔ ٹویٹ میں مزید کہا گیا کہ: کیا آپ نے پریس کانفرنس کر کے نہیں کہا تھا کہ "کرناٹک اندھیرے میں ہے" اور اب آپ نے اپنے گھر کو چوری کی بجلی سے روشن کر دیا ہے؟ 

بجلی چوری کے الزامات پر کماراسوامی نے ردعمل ظاہر کرتے ہوئے  کہا کہ یہ میری غلطی نہیں ہے بلکہ نجی ڈیکوریٹ والوں  نے یہ غلطی کی تھی۔ اس نے قریبی بجلی کھمبے سے ہی سیدھا کنکشن دے دیا۔ حالانکہ جب مجھے اس بارے میں پتہ چلا تو فوراً اسے ہٹوا دیا اور گھر کے میٹر بورڈ سے بجلی کا کنکشن دیا۔ کماراسوامی نے مزید کہا کہ  مجھے اس عمل پر افسوس ہے۔ لیکن کانگریس جس طرح ایک چھوٹے سے ایشو کو بڑا بنانے کی کوشش کر رہی ہے، وہ بھی مناسب نہیں ہے۔

دراصل، کانگریس نے سابق وزیر اعلیٰ کمار اسوامی  پر حملہ آور ہوتے ہوئے  کہا کہ سابق وزیر اعلیٰ کو سجاوٹی لائٹ لگانے کے لیے بجلی چوری کرنی پڑی۔ انھیں سمجھنا چاہیے کہ کانگریس حکومت ’گرہ جیوتی‘ منصوبہ رہائشی کنکشن کے لیے ماہانہ 200 یونٹ مفت بجلی دیتی ہے، نہ کہ 2000 یونٹ۔ کانگریس نے طنزیہ انداز میں یہ بھی کہا کہ اگر آپ اتنے ہی غریب تھے تو آپ کو ’گرہ جیوتی‘ منصوبہ کے لیے درخواست دینی چاہیے تھی۔