ہوناور،  2 / اپریل (ایس او نیوز) کاسرکوڈٹونکا کے ساحلی کنارے  پر مجوزہ تجارتی بندرگاہ کے منصوبے کے تحت گزشتہ سال جو سڑک کی تعمیر کا کام مقامی ماہی گیروں کے احتجاجی کی وجہ سے ادھورا چھوڑا گیا تھا اب پولیس کی کڑی نگرانی میں اسے مکمل کرنے کی تیاری ہو رہی ہے ۔
    
موصولہ رپورٹ کے مطابق پکّی سڑک بنانے کے لئے مٹی بچھا کر جو کچا رستہ بنایا گیا تھا اب وہاں مزید مٹی ، جیلی، پتھر وغیرہ لا کر ذخیرہ کیا جا رہا ہے ۔ اس سے اندازہ ہو رہا ہے کہ اب اس کچے راستے پر تارکول بچھانے اور پکّی سڑک بنانے کا کام آگے بڑھے گا ۔ 
    
معلوم ہوا ہے کہ مقامی گرام پنچایت کی طرف سے محکمہ بندرگاہ کو مراسلہ بھیجا ہے جس میں اس سڑک کی تعمیر کے لئے فنڈ، ٹینڈر کی تفصیلات پوچھنے کے علاوہ  پنچایت کی طرف سے اجازت نامہ کیے بغیر تعمیری کام آگے نہ بڑھانے کے لئے کہا گیا ہے ۔ 
    
دوسری طرف مقامی ماہی گیروں نے  اس صورتحال پر 'دیکھو اور انتظار کرو' کا رویہ اپنایا ہے ۔ آگے حالات کیا رخ اختیار کریں گے فیل الحال یہ کہنا مشکل ہے ۔